BoxingDay寶島地震呢個小型災難（呢個係電管局嘅講法），一個唔該震斷六條海底電纜，搞到香港對外通訊六脈齊斷。呢次天災，牌面睇個個都係輸家，出名反應「快」嘅電訊管理局都係，其中又以李家二少嘅8號仔電盈最「甘」，大家幾乎想連地震都入埋佢哋數。
不過，有危必有機，出名轉數快嘅橋王王維基，又輕易搵到位，使啲錢就搶二少嘅客仲可以串番佢夠本。好話唔好聽，真係乜仇都報晒！
貫徹撒旦本色
話說響地震發生之後幾日，王維基嘅香港寬頻已經登咗一次廣告，話以鞏固香港電訊樞紐為己任；大前日佢又失驚無神開記者會，推出畀援助交際更有援助feel嘅「bbAID易您網」上網援助服務，擺到明撬8號仔啲客；今日仲正，老王貫徹佢魔鬼撒旦嘅本色，響六份中文報紙刊登六個全版廣告。
接近香港寬頻權力核心人士話，呢輯廣告主要sell個品牌同埋比人哋穩定，但再細味六版廣告啲字，係人都睇到寸緊8號仔，好似最尾嗰版話，自己多後備capacity，字面解話自己多partners撐……深層次解讀即係寸二少仇家多無人幫！
贏唔到大錢都贏口碑
老王連執二少三劑大約要使幾多錢？真係抵玩超值開心價，據聞只係五球（500萬元）左右，而老王仲諗緊下一招點出。係嘅，好似打牌咁，有謂落場無父子（況且佢哋唔係），千祈唔好心軟放生弱家，一定要食住個勢「誅」死佢，實行贏唔到大錢，都贏口碑！
𠵱家係地震發生後第三個禮拜，仲係弱家嘅8號仔可以點呢？唔知二少會唔會好似老王咁，整番幾版全版廣告還拖呢？係就要代肥佬黎多謝佢先啦，麻煩記得要8個全版襯番8號仔個number！