到陸羽飲茶，大陸T赫然在座，T兄七八年前遷居大連，一年返來香港三幾次，每次都到陸羽見吓班老友。此日氣溫十零度，左丁山着毛衣兼西裝，大陸T只着恤衫一件，俾佢話：「好凍咩，着咁多衫㗎？」點同呢，大連氣溫在零度以下，大陸T習慣咗，梗係話香港唔凍啦。
大陸T原定星期四返大連，但因大連大霧，機場關閉，返唔到去。據《文匯報》講，中國有四大「重霧深鎖都市帶」，分別係東北平原（哈爾濱、長春、瀋陽、丹東、大連），京津冀（北京、天津、石家莊）；長三角（南京、上海、寧波、杭州、無錫）及珠三角（廣州、深圳、珠海、香港、澳門），今年大霧特多，華北交通告急，大量乘客滯留機場。
大霧係天氣現象，但中國因為到處污染，大霧與灰霾（音迷或埋）分唔清。香港天文台刻意美化空氣污染，故意用一個術語「煙霞」，唔似內地咁用「灰霾」嚟描述同一現象，即懸浮粒子滿天，遮蔽天日。廣東省專家話，「霾」主要由平均直徑只0.31微米嘅細粒子大氣溶膠組成，「霾」不但影響視野，更加可以透過呼吸系統進入我哋嘅肺部，再進入靜脈，危害人體，引發鼻炎，支氣管炎，甚至誘發肺癌。
聽見「灰霾」呢個詞，警剔性容易提高，聽到「煙霞」喎，小記者G話，令佢記起中學時代讀瓊瑤小說《煙雨濛濛》，甚有詩意，而且浪漫。可惜呢，中環路邊監測站嘅空氣污染指標日日偏高，朝早六點冇幾多汽車入中環，指數已經去到偏高水平，明顯與汽車排放無關，如果抬頭望天，灰濛濛一片，呢啲係「煙霞」？小記者G話咁真係莫名其妙。香港天文台唔改「煙霞」兩字，左丁山以後唔理得佢咁多，一於用「灰霾」，橫掂所有報紙都用蓋茨唔用基斯咯，用「灰霾」更加政治正確㖭。講番大陸T，佢話如果大連機場繼續唔掂，佢可能飛上北京，再搭火車回家慰妻喎。佢唔講我哋都唔記得咗，佢已在大連成家立室。香港男人上到去，幾難唔向東北佳麗投降。