中信泰富噚晚突然公布人事變動，升咗集團主席榮智健長子榮明杰做副董事總經理，正正式式成為佢老爸同埋董事總經理范鴻齡以外，中信泰富集團嘅numberthree。喺93年加盟中信泰富嘅榮明杰，現年應該只有38歲到，目前主力負責集團內地地產項目。
單身貴族 與父同住
繼承咗爸爸「榮太子」稱號嘅榮明杰，除咗搞內地地產外，亦係中信泰富12名執行董事嘅其中一名，之前曾經坐鎮喺國泰航空，做非常務董事，幫手睇住國泰盤數，不過，佢經已喺舊年9月辭職。坊間估計，佢辭職應該係因為要留番個董事位畀新股東國航喎。
榮太子雖然喺93年已經加盟中信泰富，但係佢為人非常低調，直到舊年年頭，佢先至肯大大方方咁走出嚟見傳媒。據未經證實嘅市場消息，榮明杰仍然單身，𠵱家仍然同阿爸喺淺水灣一齊住。講開又講，佢個細妹榮明方都係喺中信泰富身居要職，主力係睇數。
中信泰富喺公布榮太子榮升嘅同時，亦同時公布多兩項人事變動，一個係執行董事張立憲，同樣升做副董事總經理，而另一個副董事總經理阮紀堂將會辭任，轉去集團全資附屬公司中信1616，佢嘅新任務係出任董事及行政總裁，搞番環球互連平台同埋電訊樞紐服務喎！
[email protected]