男女分手本屬平常事，但再見仲係朋友就唔係人人得！前晚Nike喺中環七號碼頭搞咗個派對，吸引成班TVB嘅哥仔同姐仔捧場。崔建邦為避舊愛唐詩詠，喺場內左閃右避，認真小家。
話說當晚十點左右，崔建邦、陳山聰同成班麻甩仔喺場度吹水傾偈，中途楊怡同唐詩詠嚟到，楊怡自然就join埋一齊傾，崔建邦此地無銀，一見唐詩詠即刻自動彈開，動作好鬼誇張。崔建邦之後企埋一邊，後嚟又成功搭訕場內另一潮女，點知寃家路窄，潮女竟然又係唐詩詠朋友，避無可避之下，崔建邦焗住同舊愛傾兩句，但全程就神色尷尬，相反唐詩詠表現自如。
陳山聰楊怡過電
難為崔建邦喺場外仲同記者扮大方話：「我哋有打招呼，冇尷尬，好平常啫，佢同黃宗澤只係同事，無乜特別啦。」
同場陳山聰同楊怡愈傾愈埋，兩個人更轉到吧枱一角繼續，楊怡仲傾到用手拉住陳山聰嘅毛毛褸，男方又細心咁用衣袖幫佢抹眼角，態度親暱，似乎有啲過電。玩到十一點半，兩人與唐詩詠結伴離開，三人行到IFC攞車，由陳山聰做柴可夫送兩人離開。
