超英趕美呢個已經唔止係口號，工行上周就率先成功越英過美，點解咁講，上周四上午，工行A股大漲9.52%，創6.79元人仔新高，同一時間，其H股亦見5.15港元，呢一刻，工行以總市值有成2732億美元，成為全球第一大上市銀行，只可惜，呢個冠軍寶座未坐暖，佢又「落番嚟」。
喺上周四（4日），A股節節上升，尤其銀行股升勢欲罷不能，工行A股喺11點後，升至6.7人仔嘅時候（當日最高曾見6.79人仔），工行H股亦企定定喺5.15港銀水平，以當時A、H股合計，工行市值達到2732億美金，全球上市銀行第一大花旗集團以1月3日嘅收盤價位計，總市值亦只不過係2714億美金，就係嗰18億美金之差，花旗阿一地位不保，畀工行坐咗。
老百姓好清醒
點知到咗下晝，工行A、H股齊齊插水，工行總市值回落到2470億美元左右，雖然「全球第一大上市銀行」呢個稱號只係曇花一現，已令內地市場雀躍。
不過，股民都唔係完全盲目嘅，有啲網民好心水清，話將工行同花旗比只係笑話，老百姓唔在乎曇花一現嘅稱號，甚至有網民話呢啲只係泡沫，內地銀行股已開始落斜路㖭。
只不過，華華覺得若果獅子行葛霖繼續瞓，唔難保有朝一日好似龜兔賽跑咁，被工行追上。