上周四，大戶趁高位沽售中資金融股獲利，工商銀行（1398）喺5.16元急挫至昨日4.78元，共跌咗7.36%；建設銀行（939）亦喺5.28元跌至昨日4.89元，共挫7.39%；而H股指數當也扭轉連續多日以來嘅升勢。《香港討論區》就有網友擔心嚟緊中資金融股會出現沽售潮，司農神君問周圍手揸五行嘅網友，「喺咁嘅環境，你會沽邊隻銀行股先？」
網上調查結果稍為出人意表，中國銀行（3988）成為主要嘅拋售對象。中行由舊年6月上市至今，股價升咗46%；但有近四成網友話會先沽中行，可能嫌佢揸太多外幣，人仔升值對佢最不利。
要沽 首選中行
相反，五行中走勢最凌厲嘅招商銀行（3968），上市才短短3個多月，股價足足升咗1倍，都高居拋售榜第2名，有28%網友投票話會沽出。
至於工行，畢竟係內地銀行股龍頭，網友對佢比較有信心，諗住可以放心揸耐啲，自10月尾上市以來，股價雖然「只」升61%，但僅11%嘅網友話會沽售。此外，交通銀行（3328）及建設銀行，亦各佔11%。
其實，唔少網友根本冇考慮沽五行，Qt330好老實咁講：「點會沽呀！如果揸中長線，怕乜佢跌啫，我始終認為銀行股個價，跌極都有個譜。」網友南星仲力撐話，「我就長線睇好工行同交行，工行嘅目標價6蚊，交行就10蚊啦。」Justintime更揚言：「我係唔會沽佢哋嘅，反而趁低位入番多少㖭！」
