上周五人行出其不意調高存款準備金率，估計會對A股同埋H股構成心理壓力。不過有分析員形容呢個係打壓股市措施，就好難認同，事關國內銀行吸收存款能力極高，去年宏調之後，已唔敢借咁多錢畀地產行業，結果係銀行繼續持有大量存款而借唔出，調高準備金率係姿態多於實際效用。
中遠國際（517）上周五急升13.4%，繼續炒分拆房地產業務。公司早前向母公司收購中遠地產24%後，持股增至44%。
另外，內地報章報道大摩、美林及渣打入股成為中遠地產策略股東，以協助中遠房地產在本港上市。目前中遠房產有資產約140億元人民幣，去年6月底止土地儲備為350萬平方米，在售樓面面積約100萬平方米，其中有7個項目位於北京，即係又具08申奧概念。
350萬方米土儲不算多，只能算中小型地產商，勉強比較，深控（604）市值102億元，土儲410萬方米，綠城中國（3900）市值203億元，土儲865萬方米，而中遠國際市值不過50億元，連同船舶服務資產，比一比就知中遠國際價值何在。
太A終於破頂
上星期五地產股忽然爆升，雖然係幾無厘頭，但係既然有咁多錢入市炒地產股，應該唔會炒一日咁短癮。除咗龍頭地產股破頂之外，連地產發展及收租股太古A（019）都抽埋上去，破咗去年9月以來，4次上試85元都唔穿嘅魔咒。太A另一上升動力，來自近期油價急挫，自從去年港龍重組之後，太A的航空業務比重反而增加咗，而近期油價急跌，國泰（293）料隨時再展升浪，分分鐘帶起埋太A，今日太A回吐如守得住85元可買。
歐陽風