久違了嘅意大利兩頭馬車互撼，AC米蘭主場以3:2殺退死敵祖雲達斯！冇錯，球迷的確冇聽錯，係呢兩支班霸交鋒，但祖記並非提早升班，而係喺上周六嘅貝盧斯科尼盃度相遇，戰情亦殺得異常激烈，「金童」廸比亞路久旱逢甘露，有份建功，一解眾粉絲之渴！
估唔到一場友賽，AC同祖記都派出強陣應戰，恩沙基、基拿甸奴、馬甸尼、尼維特和查斯古特等悉數披甲，可見兩軍對呢場波嘅重視程度；而AC就憑「執雞王」恩沙基先開紀錄；其後，祖記接連反擊，並由尼維特及「金童」頭槌建功反先；點知，AC好似當盃賽決賽咁踢，遲遲唔肯收起主力，中場施多夫扳平後，再喺臨完場階段，由預備組兼後備入替嘅前鋒奧賓美耶奠定3:2勝局，奪得貝盧斯科尼盃，亦好可能係球隊今季唯一「錦標」！
祖記輸波兼損兵折將
降到去意乙嘅祖記重遇「同級」勁敵輸波都唔止，仲傷咗兩名守將基亞連尼、保桑，以及年輕射手柏拿甸奴，無怪乎祖記主帥廸甘斯，賽後苦澀咁唉聲歎氣：「我寧願大敗一場，都唔希望打得好而輸波，仲要增加多幾件十字軍；大佬呀，我哋仲要為升班努力㗎。」
「如無意外，呢場波都應該係祖記今季唯一重量級大戰，所以位位星級戰將都爭住落場，緬懷吓昔日風光，輸贏都係其次喇！」