呢個世界真係「跟紅頂白」，一度係基金界寵兒嘅滙豐控股舊年股價長期跑輸大市，近期芬佬對班管理層冇晒耐性，連番炮轟佢哋，仲有美國及投資銀行等業務，就連英國傳媒都已經唔係好客氣，負面報道紛至沓來，簡直好似大合奏。
舊年年底，先有《每日電訊報》引述當地著名基金經理MichaelTaylor形容，滙控主席葛霖似乎喺工作上瞓着咗，未夠資格當主席云云；之後，《星期日電訊報》又話，滙控股價表現落後其他競爭對手，高層管理人員嘅「表現花紅」將泡湯。
《泰晤士報》最近特登搵滙控嘅財務董事范智廉傾偈，探討點解滙控會失去「光彩」：原來滙控股價06年全年跌咗0.2%，係全英股價表現最差嘅銀行，如果用過往5年嘅紀錄嚟睇，更係僅次於萊斯銀行、成為表現第二差嘅銀行股。
面對千夫所指，范智廉嘅回應似乎都好官腔，而且並冇流露出任何洩氣嘅迹象：佢話感受到市場壓力，𠵱家要做嘅係：做好策略執行、管理風險及對外溝通；佢仲話，如果將所有時間擺喺股價上唔係好事；反而，應該將時間擺喺推動股價嘅事情上、確保呢啲事情做得啱，咁自然會喺股價上反映出嚟。
新一年換新血
剛剛踏入07年，董事會就搵咗啲新血，包括委任前墨西哥央行副行長趙達賢加盟；又將曾經喺投資銀行高盛工作嘅SimonRobertson、提升為高級獨立非執董，啲英國傳媒話呢個舉動好重要，因為𠵱家滙控嘅主席係由執行人員負責；稍後仲會乜招數，大家就要拭目以待喇。
[email protected]