入餐廳點菜冇餐牌，咁即係叫人唔使食呢？絕對唔係！齋舖老闆娘馮太就係唔想個個客人食一式一樣的套餐，「由我為每枱客度身訂做宮廷齋菜宴，保證唔會同人撞，每次到來都有全新的驚喜」我問馮太︰「今日食乜？」馮太就好似個人肉餐牌咁話︰「不如食……」做到同餐牌二合為一的功力，唔係一朝一夕㗎！
記者︰方綺君
攝影︰林栢鈞
自從嫁咗畀精通太極拳和書畫的老公之後，馮太開始同老公一樣食長齋，1日3餐都包辦老公的飲食，到有一大班學生來家中上堂，每次馮太都出手煮齋菜給大家享用，久而久之，有學生就話︰「不如你開番間齋舖，我哋咪可以名正言順畀錢食飯囉！」就是這個提議，馮太在灣仔開了第1間齋舖。
擺乜上枱就食乜
一路做落去，馮太的客路愈來愈廣，開始諗轉型，私房菜人人都做，點樣突圍而出？「不如無譜咁做啦！」無譜，做極有個譜好喎！馮太指的無譜，即客人入座後擺乜上枱就食乜，不過有冇蝦碌事件呢？「梗有啦！有啲客人話呢樣食過，嗰樣又食過，有啲又唔啱胃口，要做到無譜真係好難！」不過在唔放棄的態度下，馮太於是將每位客人食過的菜式都會紀錄在電腦內，每次再訂位講出名字就可一目了然，若冇特別要求Encore的菜式，一般都可以食到全新的菜。咁今日煮乜好？「睇吓廚房有乜就即時配搭煮乜，煮咗咁多年，邊種食物同乜嘢材料混合有乜效果？全部記晒入腦。」做到菜牌同人合一，問你服未？
珊瑚壽司拼盤
在碟中間的是入口自台灣的紅海珊瑚，含有豐富的植物蛋白，非常有營養。其他前盤有素火腿、壽司、水果，已經好豐富。
皇廷錦繡鴛鴦餃
蟹粉小籠包和素菜水晶包，Size細細個可以一啖放入口，外皮全部都是馮太親自搓，咬落份外彈牙。
貴妃蜜誓滿心甜
名字好靚，賣相都唔差，將荷蘭蘑菇仔、椰果、青芹、龍眼肉炒熟後放入焗好的蛋撻皮上。味道甜甜哋，同個名一樣食到滿心甜。
亁坤福袋
福袋內的餡料有西洋菜、冬菇、紅蘿蔔等，切細後用醬油醃一醃，蒸好後味道濃，配上清淡的杞子粟米中和番，味道剛好。
黃金素翅
店中王牌菜，最多客人Encore。素翅用蒟蒻製成，口感同真翅一樣，街外通常用南瓜，馮太就用營養更高點的甘笋做湯底。
讚
有晒客人食過的菜式記錄，每次幫襯都有新菜式，夠創意，多驚喜。
彈
想周未嚟食的話，通常要等3個星期，想即興來食都唔得。
食神評級
（以5個★為滿分）
食物︰★★★★
環境︰★★★
服務︰★★★★
睇路搵食
貴德宮（21158880）
地址︰灣仔灣仔道140號1樓B舖 (大快活旁樓梯上一樓)
營業時間︰星期一至日12nn-3pm、7pm-10pm
座位︰100位
收費：11道菜午市$168（2位起）晚市$198（2位起）。
交通︰灣仔地鐵站A3出口，到地面後過馬路轉左行約10分鐘。