最近高達熱潮有再起風雲之勢，兩隻勁Game都以高達大戰渣古相繼到港，一部街機《SpiritsofZeon》，一部係X360《機戰XO》，真係出街又打，返屋企又打，加上年輕一代高達Game迷仲有鋪做壞蛋癮，所以兩個高達Game都可以比扮壞蛋紅蟹或渣古，向聯邦軍高達狂抽。
文：陳福榮
ImageModel：Va、Coffee
鳴謝：旺角新之城遊戲機中心
街機
做自護硬𡁻聯邦
名為《機動戰士高達SpiritsofZeon~修羅之雙星》嘅新Game最近街機勁紅，每當有人入錢打都會吸引唔少途人圍觀，當然靚女打機就有更多人昅嘢啦。同以往高達唔同，《修羅之雙星》係講自護軍兩位名不經傳嘅機師「刀疤仔」Kurt和「金毛飛」Robin初次上戰場，隱藏於組織逐一擊破聯邦軍高達。過程中，其他串星「三倍速」馬沙、「白色惡魔」阿寶、「紅色閃電」尊尼雷登、「白狼」松永真同「疤面煞星」巴茲魯都亮相，不過全部係嚟搞亂檔，所以咪俾佢地阻頭阻勢。但點解主角唔係聯邦軍嘅？Hey，你睇電視幾時見過啲吉姆勁抽到打爆大魔同勇士㗎？
經典打鬥場地
版面全屬大家好熟悉嘅查布羅、紐約和所羅門，跟番原著，例如當年睇到雙眼發光嘅「馬沙紅蟹插可憐小吉姆」經典場面，分別在於馬沙同你爭食，只要殺敵多過佢就拎到Bonus；每關有中波士及大波士，第一關要解決天馬號母艦，最尾有「黑高達」RX-78-1對付你，第二、三關都係班次等高達，咁阿寶部RX-78-2呢？佢點射都唔爆，只響途中搵你嚟抽水咯，毋須理會。
手握機槍跟足渣古
Bandai用番《TimeCrisis》嘅操作，包括平時槍嘴指向畫面係怒射子彈向前衝、擺側支槍就變成Reload、前衝係米加粒子炮等，玩開射槍類型一定唔難上手。武器方面，照抄渣古著名機槍嘅槍形控制器嚟玩，按住扳機係連射，配合側邊嗰副武器掣，就有火箭炮、手榴彈、熱能斧等。手榴彈掟出去會整停啲敵機，你有充足時間逐隻瞄住射，雙打喺打大佬嘅時候儲夠一定能量計，即可發動威力勁大嘅「修羅雙連擊」，發揮王牌機師嘅實力
玩家意見太滙集
西裝先生：「都唔係第一次玩咯，點都係高達Fans嘛。作為街機遊戲畫面雖然唔算太靚，但玩法OK值得煲。」
Coffee：「覺得幾刺激，一鋪又玩得耐喎，但支槍好鬼重呀！女仔玩點都爭啲。」
Profile
機種：AC
廠商：Banpresto
類型：STG
人數：1-2人
價錢：每局$5
XB360
《機戰XO》靠靚加對戰搶客
另一隻以高達同鐵甲萬能俠等機械人作賣點係首次登陸XB360甚至XB系嘅《機戰XO》，今勻都算畀足面微軟，事關以日本嘅主機銷量，《藍龍》投資咁大都未必賺得番一半成本，何況專攻機迷市場嘅《機戰》？為咗減低風險，廠方於是將前年隻《機戰GC》大幅度加強補弱，再因應XB最引以自豪嘅Live增設網上對戰玩法。
全3D畫面冇得彈
《機戰XO》受惠於360嘅強勁高解像度畫面，戰鬥時嗰啲3D機械人無論動作或造型都係歷代之冠，配音場面、特定劇情重新做過，又加入機迷引頸以待嘅金毛獅王與勇者系列，玩開PS2版都會即時發現XB360嘅可取之處，今集佢會加啲過往從未使用過嘅全新關數及追加事件，保證無論係咪新客仔都必定會收貨咁話喎。
打斷腳未瓜得
除咗畫面勁靚九倍之外，佢嘅援護攻擊、合體攻擊以至改變主角機裝備，都可以睇得一清二楚，相對之下PS2嗰幾集真係唔多掂。系統方面有啲似《前線任務》，成部機械人嘅HP會分為頭、身、手和腳嚟計算，爆頭爛手唔會即死，只係嚴重影響作戰力，惟有身體損毀先至當瓜柴，某程度上部機都叫做襟打咗，亦即係話每關嘅攻略時間亦會長咗。此外，Game嘅另一賣點網上對戰玩法，就係預先Set好小隊組合，落到場就即時互抽，唔夠打或者想一口氣擊破對手不妨善用精神指令，只要勝出比賽即能獲得小金幣，從而購買扭蛋以取得特別版機械人。
Profile
機種：XB360
廠商：Banpresto
類型：SRPG
人數：1人
價錢：$299
售賣點：I-Gamer（27253338）