一向秉承中國人知慳識儉的美德，買嘢首要原則是「大件夾抵食」，但凡超市大減價，必見我蹤影！雖然如此，但講到買車則例外，事關一直未有遇到過可以稱得上是大件夾抵食的選擇，直至早前花了3日試過韓國現代的Tucson，我開始有所動搖，因為這架2.7V6頂級版SUV車價唔使20萬已經有齊天窗、真皮椅、霧燈等設備，大大架坐得舒服又夠實用，感覺就好似去超市「執平貨」一樣咁興奮。
記者：黃婉冰
攝影：伍慶泉、林栢鈞
Model：Isis
車廂用料大躍進
要評價一架車，不能過於主觀，自知本身對韓國車一向興趣不大，試車時特意誠邀各方好友幫吓眼，經過3日長期測試後，綜合各人意見得出結論如下：1）2,700c.c.V6引擎夠力水，比2,000c.c.2驅版（前驅）更有衝勁。2）車廂寬敞，特別是真皮座椅，夠軟熟舒服。3）實用率夠高，尾廂夠大，設備實而不華，給人一種細心體貼之感。4）Finishing、用料明顯比以前好，膠Feel不再。5）4前速+/-波箱比以前有進步，但還是略嫌其1波有點兒長氣。6）車廂隔音還有待進步。
雖然2.7版算不上有好豪華的設備，但若照單全執的話，電天窗、真皮座椅、鋁質行李架、恒溫冷氣等，閒閒哋埋單都要過萬蚊，但家陣列入標準裝備，齊料廿萬有找，相比其他同級SUV起碼平一半，「大件夾抵食」，這亦是它永遠有「粉絲」力撐的原因。
設備齊全實用率高
對足3日，優、缺點知得一清二楚，先論優點，一句講晒，實用率高，無論空間或設備均以實用為本，可掛雜物袋的掛鈎分布前後座，梗有一個喺左近，買完餸一袋二袋最啱使。仲有可放足十多廿個「大餅」的碎銀兜，攞錢好就手，但最深得人心的還是其車尾廂，拍低後座，容量高達1,375公升，閒閒哋可以放入4、5個大篋，長如滑浪板、魚竿都不成問題。尾門的玻璃窗可獨立開啓，大頭蝦唔小心泊得太貼牆，存取物件一樣方便。還有車頂行李架、行李繩網、手枕連儲物箱、杯架等，設備比旅行車有過之而無不及。
+/-波箱略長氣
但我始終認為，世上無一架車可以稱得上十全十美，毫無缺點，正如Tucson，它亦有不足之處。起步、中尾段不錯，夠爽快，遇上爛路，單憑其差速鎖定功能，照樣輕鬆「踩」過，當然，爬山就無可能啦。滿載5個大人亦唔覺吃力，唯獨是波箱，仍有進步的空間。之前試過其房車Sonata，毛病同樣出在其+/-波箱，雖然Sonata的小毛病沒出現在Tucson身上，但Tucson的「新症」是過於長氣，每次轉波，波檔與波檔間的「交接動作」始終未夠爽快，由1波上2波拖得較為長，而且只得4個波段，當在大直路上想再進一步時亦只得忍手。
抵讚：
內櫳、波箱、Performance比起以前進步不少，既以SUV為本，亦能做到舒適和實用的要求，皮座椅、天窗、偌大多變的尾廂，比不少日本、歐洲SUV優勝。
要彈：
波箱反應略嫌未夠敏捷，每一個波段拖得較為長，特別是1波上2波略為長氣，車廂隔音未算完善。
HYUNDAITucson2.7Specifications：
引擎：2,656ccV6DOHC
馬力：175ps/6,000rpm
扭力：2406kgm/4,000rpm
傳動：4前速半自動波4輪驅動
車價：$199,000
車輛提供：現代汽車香港（34288288）
話你知：SUV──唔識爬山嘅四驅
SUV長寫為「SPORTUTILITYVEHICLE」，即「運動功能汽車」，查實SUV都係由四驅車演變出來，但兩者分別係，SUV只係得四驅功能但無爬山功能，而四驅車則具備四驅功能兼可以爬山涉水，所以兩者價錢都差一大截。