恒基主席李兆基娶新抱大派銀紙完全表現出佢使錢幾咁豪，恒基旗下嘅大埔比華利山推出，講明係豪宅，既然老闆咁捨得使錢，班員工喺宣傳方面梗係絕不手軟。
舊年佢哋賣土瓜灣翔龍灣，搵04年環姐冠軍JenniferHawkins做代言人，今年照辦煮碗搵環姐，但轉咗05年嘅冠軍NatelieGlebova，橋唔怕舊，美人計呢招永遠都唔會out。
Natelie噚日到咗香港，今日會見傳媒，夜晚又有歡迎酒會，華華知道Natelie讀音樂出身，唔知係咪咁，酒會請埋鋼琴家李雲廸嚟表演。
恒基對細路仔一樣照顧周到，佢哋響日本搵咗創作鹹蛋超人兼幫HelloKitty做形象設計嘅設計師中田和幸，幫呢個盤設計兒童樂園「開心林」，創作幾個卡通人物，營業部總經理謝偉銓（左）同副總經理林達民（左二）仲變成大細路，講故事𠱁到班小朋友鬼咁開心㖭！
黃耀興攝