特區政府話要立例管制使用VOCs（揮發性有機物），最快於七月一日生效，目的係減少排放，有助於阻延地球暖化。VOCs係乜嘢化學物體，左丁山烏垂垂，但睇真吓VOCs存於甚麼日常用品，咁就明白咯。環保署話香港VOCs嘅來源有四大類，（一）油漆料30%；（二）汽車排放25%；（三）消費品24%；（四）印刷業13%，其他來源佔8%，管制用VOCs之後，香港一年可以減少VOCs排放量八千噸。所謂管制，就係採用最嚴格嘅美國標準，令到一般噴髮膠，空氣清新劑，殺蟲水噴霧器，含VOCs油漆料等等都唔可以用。
為保護環境而限用VolatileOrganicCompounds，值得贊成，但不可不知，唔用VOCs，家居與工業嘅成本會增加，最後會由消費者負擔，香港人唔好以為環保唔使錢，清新空氣嘅成本其實幾貴吓，譬如興建環保式高科技焚化爐，就需要好多錢，將來每家每戶可能要每月繳交三十元垃圾費。一般常用嘅油漆，天拿水氣味極濃，左丁山一聞到就咳，兼夾會喉嚨亁。去年第二季，家居裝修，老友披圖梁教路用環保油，唔用傳統油漆。打吓價，裝修佬話環保油價錢貴兩三成，為咗自己健康，一於照磅。嗌吔，原來唔係好多人願意用環保油，裝修佬唔係好夠經驗，估計完工時間完全錯晒，搞到大家都好狼狽。原來環保油唔易亁，髹三四層油，要超過一個禮拜時間，於是牽一髮而動全身，乜都拖慢晒。
好嘞，卒之叫做勉強完工，好處係室內幾乎完全冇氣味，全屋木製傢俬、石牆等等吹風一日，氣味消除，但係油漆面唔夠光澤，一旦染上污印，比較難抹甩、刷甩。油漆界人士話中國人喜歡油漆「立立令」，易洗抹，所以冇VOCs唔得，一啲親戚嚟到左丁山屋企，都彈油漆「暗暗地，冇光澤噃」。嗱，揀環保，唔用VOCs呢，還是揀靚，堅持用比較廉宜嘅VOCs油漆料呢？任你揀，可能七月一號之後就冇得揀，大家裝修屋企，成本要預多啲！