上個禮拜真係刺激。原材料大跌，跌得最慘就一定係孫柏文最喜愛的白銀，3日之內，跌7%。中資國企股都受到嚴重回吐壓力，被我譽為今次H股泡沫龍頭，猶如當年科技股Cisco嘅中國人壽2628，亦係3日內有高達17%嘅波幅。好彩中國人壽係一間國企公司，如果係一間土生土長香港人建立同營運嘅公司，港交所同證監會都已經要求佢出通告解釋。
不過，上市公司出少啲「唔知道點解股價大上大落」嘅通告，對環境保護都好啲。因為我都係一個環保分子，所以我好支持「untouchable」嘅國企來港上市，繼續支持港交所同證監會排擠土生土長嘅公司。呢幾日股價大上大落，最大得益者肯定係班輪商。淨係睇中國人壽禮拜五嘅波幅，都知道輪商淨係靠朝頭早嘅過山車走勢，已經因為引伸波幅，可以將認股證嘅溢價校到好高。
其實，呢幾日嘅金融市場波動，源頭就係上個禮拜三晚出嘅花旗國聯儲局會議紀錄。聯儲局會議就係喺12月進行，總括嚟講，聯儲局仲係一心想打擊通脹。就算到上年年尾，債市（憑長息率低過短息）、石油（升勢終止）、銅價（跌、跌、跌）都已經發出訊號標誌，花旗國如果唔改變方向，就會經濟衰退，但聯儲局都好似一意孤行。仲有，大家都預期聯儲局出來救市，點知一份會議紀錄，令大家夢醒。所以對經濟表現非常敏感嘅油價、銅價都相繼加速跌幅。
加按攞錢 影響嚴重
當然，有啲人完全唔覺得聯儲局可以不顧經濟衰退，覺得遲早會減息救市。例如，全球最大債券基金Pimco嘅基金經理BillGross就覺得，聯儲局今年應該減四次息，令聯邦息率去到4.25%。呢個觀點，我都相信，我都覺得聯儲局會重開印刷機，瘋狂印銀紙，所以黃金白銀下半年一定會好犀利。
大家都知道花旗國經濟會衰退嘅最大原因，就係佢哋嘅樓市正在爆煲。多嘅我都唔講，因為樓價唔升，花旗國人民淨係少咗加按攞錢，都會嚴重影響經濟。花旗國分析員BarryRitholtz計過數，01年、02年如果花旗國經濟冇咗業主加按攞錢，已經會有嚴重經濟衰退（表）。02年之後，花旗國經濟愈嚟愈依賴業主加按，所以今年冇呢筆錢，除非聯儲局減息，經濟都好難唔衰退。
最後，我想講買基金，特別係買指數基金。好多人覺得買指數基金好穩定，因為覺得基金唔會經常買入賣出。不過，花旗國MarkCuban講過，買指數基金其實只係買決定指數成份股公司嘅眼光。每一次加入、剔除或改變成份股，你就已經進行了買賣，所以唔好覺得指數基金唔會經常買入賣出。