上星期油價唔知點解突然狂瀉，兩日插咗9%，呢種情景實在動魄驚心。雖然一般本地投資者唔會買石油期貨，但係油價咁跌，就殃及好多石油股，更加令唔少高位追貨嘅投資者損手。
其實唔單只係油，其他商品表現都唔係咁理想，加州聖地牙哥JAP喺《superiorinvestor.net討論區》講：「我最近特別留意商品行情，知道近月煤價大跌，好多煤股都跌到低位。如果各位網友同我一樣，係個愛撈底（正統說法係崇尚價值投資法）嘅投資者，就要密切留意吓呢類股份嘅走勢。」
Thezter就話：「啲人真係善忘，𠵱家就話聽到啲報告講今年冬天比正常暖，會影響油價同油股，但係佢哋仲記唔記得之前有好多年嘅冬天，真係凍…凍…凍…凍死人！」
Corey無無聊聊咁講：「我就希望唔好咁凍嘞，好似𠵱家咁約華氏50度（攝氏10度）就剛剛好，呢個係我最鍾意嘅溫度，最好出街跑吓步。」之後佢又好認真咁回應話：「雖然我對商品市場了解唔深，但係覺得可以睇長遠啲，可能遲啲會凍番，咁油價同煤價咪會升番上去囉。萬一真係唔凍，咪當長揸，直至下個冬天，睇吓有冇運行。」
趁機撈底有得執
對於煤業似乎有啲興趣嘅Hshah78就請教網友：「究竟有冇煤股好介紹？」對於呢個問題，JAP就叫佢上網站Yahoo!Finance度查吓，佢話好易搵到，仲話其實有好多選擇。
Mr.Gekkor認為𠵱家啲天氣咁反常，都係人類用石油燃料用得太多。不過佢贊同煤價反彈潛力幾好，因為比起油，煤的確較抵。
現時美國嘅大型煤公司包括ConsolEnergy、InternationalCoal、MasseyEnergy、ArchCoal同PeabodyEnergy等，香港就有兗煤（1171）、神華（1088）同上個月掛牌嘅中煤能源（1898），不過各地煤價走勢唔同，值唔值得入貨或者幾時入貨，就要做吓功課嘞！