謝霆鋒去年瞞着母親狄波拉秘密和張栢芝結婚，令拉姑痛心疾首，事後還公開表態認仔不認新抱。不過都說女人是善變的，據聞栢芝自從搬出老公做和事老，並施展送名牌招數後，本來㷫爆的拉姑已火氣盡消，前日她手挽逾萬元LV新袋，率凸肚栢芝到銅鑼灣歎越菜，還暱稱栢芝為新抱仔兼全程貼身服侍，難道變得快真的會好世界？
去年9月，謝霆鋒和張栢芝在菲律賓閃電註冊結婚，當時被蒙在鼓裏的狄波拉氣得頭頂冒煙，往後每次提起栢芝都火遮眼，婆媳關係相當惡劣。深愛霆鋒的栢芝即諗計冧掂奶奶，其積極態度終令拉姑刮目相看。
自從近期盛傳栢芝有孕後，她恃凸肚佔盡上風，加上有老公賣口乖，難怪拉姑近來態度突變，如今對栢芝愛惜如金叵羅，開口埋口稱她做新抱仔，即使為她做阿四也在所不計。
體貼傍實
笑笑口歎越南菜
早前有傳栢芝為呵番拉姑而大開水喉，不時邀對方逛街歎茶，由於拉姑喜愛名牌，故栢芝投其所好，新款LV及Prada等名牌靚衫靚袋源源不絕送上，冧得拉姑眉開眼笑。前晚兩婆媳孖住出巡銅鑼灣，拉姑手挽約10,400元的LVMonogramMirror新款手袋，栢芝則腳踏約4,000元的LV波鞋。
當晚6時多，栢芝和拉姑抵時代廣場食通天的金牛苑越南菜館開餐，栢芝戴帽及口罩、穿粉紅色厚羽絨褸遮掩肚部，但她甚為虛弱，要由拉姑貼身攙扶，兩婆媳偕同行女伴各自點了一碗湯粉，栢芝見記者拍照時即低頭避鏡，拉姑笑說：「影冇乜所謂，但呢度嘅職員唔畀。」
約20分鐘後，拉姑蹺着栢芝臂彎施施然離開，現場見她小心翼翼傍實栢芝兼護航開路，心情大好的拉姑一味笑得合不攏嘴，問拉姑是否約栢芝食飯？她風騷地說：「係呀，奶奶同新抱除咗飲茶，仲有乜嘢好做？」
媳婦疲累
精靈拉姑爭認病
反觀神情疲累的栢芝低頭不語，記者問她是否不適時，拉姑即緊張護駕：「唔係栢芝唔舒服，係我有少少唔舒服，唔想我傳染佢再傳染畀個仔啫！」然而拉姑不知幾好精神。
其後兩婆媳坐車離開，但一個小時後，記者又在時代廣場附近發現謝霆鋒的保母車，沒多久即見拉姑和栢芝登車，然後直駛至霆鋒的馬己仙峽道寓所。抵埗後，拉姑充當阿四，挽着兩大袋超市戰利品，掩護栢芝衝入大廈，殿後的霆鋒被問到栢芝是否懷孕時，他卻低頭不語。
採訪、攝影：娛樂突發組
