女藝人被品評「身材正」，多少帶點色迷迷眼光，略嫌膚淺；若以一雙長腿戰勝江湖，反倒充滿優雅美感，遐想更大！提起萬綺雯，第一時間諗起無敵42"長腿，再數就係永遠咁Young咁索，同周慧敏一樣有着不老之謎。在娛圈打滾多年仲可稱為美少女，起碼《我和殭屍有個約會》拍到第3輯，迷你裙加長靴依然引得一眾麻甩仔/佬流晒口水。或許就如呢位「十三萬靚太」（老公名陳十三）愛驅MINICooper一樣，經歷多年仍能叫擁躉甘心追捧。
文：TigerL
攝影：譚盈傑
愛上Cooper卻不懂開天窗
今日相約萬綺雯（蚊蚊）到九肚山做專訪，伊人愛驅MINICooper甫出場，銀灰色調配ParkLane獨有嘅車頭V字，攝影師見到大讚人靚車更靚！
「我之前揸開BenzA190，我比較喜歡嬌小車形，老實講泊車都易啲。呢架MINI係老公買畀我嘅，佢知我鍾意車仔，歐洲車嚟講MINI咁經典，真係不二之選。揸上手比之前架A190喺轉彎方面更勝一籌，最重要係後面兩個位比同級車闊落，（部份細車後座真係冇好過有，即俗稱DogSeat）。本來我鍾意較Sharp嘅Color，但老公揸就比較搶眼，最後就揀咗冇咁高調嘅灰色。最合我兩公婆眼緣嘅，係呢款ParkLane版內櫳加入好多電鍍裝飾，好似中控台、錶板、霧燈甚至連杯座都做咗電鍍，中控台附近亦加入碳纖物料，成架車裝飾好晒，唔使煩！」講到滔滔不絕，估唔到原來佢連天窗都唔識開，仲要問番記者轉頭，果然係儍大姐！
逆線行車暗壆照碌過
唔識開天窗事小，萬綺雯平時揸車亦充滿儍勁，「老公成日話我唔錫車，見到壆位唔識收油，Normal速度照碌過去！好彩新款MINI避震好，同車友人先唔會扽到腦震盪。」講得興起，萬綺雯喺上九肚山一段路，竟即場示範逆線行車，「咦？係咪又入錯線呀？我成日都係咁，好彩冇對頭車！」
拍拖短短幾個月就結婚，花名由「萬二蚊」被友儕改稱為「十三萬」，全因老公而升值，「老公講出好多我以前做錯事嘅問題所在，亦好直接教我一啲做人嘅道理，我以前真係好直，講錯嘢都唔知，𠵱家學精咗，唔會下下咁直去話人，凡事睇開啲。信佛之後，領悟到因果循環，你對人點，人就會對番你點，所以𠵱家仍可保持日日開心嘅心態，人都健康啲。」
斷肋骨依然要做戲
「由選亞姐到𠵱家，我確實對演藝事業有濃厚興趣，最喜歡係《我和殭屍有個約會2》，發揮得較成熟和穩定，第3輯就因受傷關係（斷了2條肋骨，傷勢確實嚴重），或多或少影響表現。」受傷後不能休養，數月來仍繼續參與演出，這份敬業樂業精神，令人不得不寫個服字。
後記：命中注定
其實MINICooper和萬綺雯，確實有共通點，MINICooper在車迷心中，當坐上去的時候，你就不會再喜歡其他的車，亦因為這樣，MINICooper在車款上是不會作出巨大的改變。
而萬綺雯也是一樣，由當初的萬二蚊到現在十三萬也好，那份儍大姐的形象也是好像沒有太大改變，永遠也能保持着一份樂觀的性格，MiniCooper和陳十三，就是萬綺雯生命裏最佳選擇，「就係佢啦！」
ParkLane版主力Sell懷舊
自從MINI收歸德國BMW車廠旗下後，曾推出了多個版本，包括最基本的MINIOne、香港有售的MiniCooper及頂級的CooperS，同時後兩者又再細分為Checkmate、Seven及ParkLane特別版，萬綺雯所擁有的正是ParkLane版本。這個版本主力是Sell懷舊，除加有頭燈框眉、頭冚貼上銀色U形貼紙，以及車身兩邊加有ParkLane徽章外，也換上專用的16吋胎軨及車廂陳設，比同系車更型更突出。
MINICooperParkLane規格
引擎：1,598c.c.直4SOHC
馬力：116ps/6,000rpm
扭力：15.2kgm/4,500rpm
傳動：6前速Steptronic半自動波
當年車價：$229,800起