地產商賣樓手法，成日被批評欠缺透明度，舊年仲因為「冇價單」事件觸發軒然大波。唔知係咪呢個原因，今次政府重售居屋，帶頭做咗好多正面示範，贏得唔少市民掌聲。
網友elevener就喺《香港討論區》留言話，觀乎政府今次嘅售樓安排，有好多抵讚嘅地方，仲舉出4大例子︰「1.資料充實︰今次房署把很多資料在網上發布，包括久違了的整幢價單、近40頁的售樓說明書、個別單位客廳景觀等，做到既環保又公開。2.靈活變通︰1月2日嘉峰臺現樓開放時間原定7:00pm完結，但礙於人潮，最終開至近8:00pm；雖然6:15pm曾一度想截人，但最終有人出面取消，證明房署有很大進步。3.現場人員態度友善︰我喺現場拍照，工作人員很有禮貌地指示禁止拍照。4.廣告宣傳絕不浮誇︰今次廣告宣傳有一貫政府廣告傳統，令人發笑，但絕不像那些私人樓盤令人恥笑。」
廣告可笑 好過可恥
canphyto同樣讚揚政府今次改善服務，認為值得各大地產商效法。不過，小賤男就抵死回應︰「發展商做到咁，仲點『坤』到人買佢啲縮水樓，佢唔搵個假圖則『坤』你都偷笑喇！」
其實「光明磊落」唔一定會影響銷情，好似房委會咁，講到明牛池灣嘉峰臺嘅未來業主，除咗要承擔附近超過10萬方呎斜坡維修責任，仲要負責屋苑小巴站嘅管理、維修及保養費；至於曾發生短樁事件嘅天水圍天富苑，售樓說明書亦提到屋苑可能會有天然沉降。雖然政府將所有衰嘢攤開嚟講，但開售當日，樂富中心仲未開門，已經有幾十人排隊，首一小時已派出千幾份申請表。據房屋署發言人稱，首日截至下午5時有逾5610名準買家參觀示範單位。
居屋因為有折扣率嘅關係，樓價相對較平，對買家始終有吸引力，雖然質素好難同私樓比，但起碼發展商（房委會）君真，市民一早知道物業利弊，買唔買係個人決定，唔使等入伙收樓時先發現問題一籮籮。