新年伊始，左丁山搵埋成班老友聚會，聽吓投資意見，辦法係搵兩三位專家講新一年嘅投資展望，畀啲冧把大家參考吓。
二○○六年一月十一日，同樣聚會中，經紀Ｋ推薦滙豐、和黃、2318、2628、1068、3399，基金Ｐ推薦2331、2088、3318，左丁山膽粗粗話要買668、267，結果如何？經紀Ｋ賺到飛起，信者得救，中人壽喺○六年一月十一日收市價係七元四角，𠵱家做幾多，唔使左丁山講，隻平安保險又係升到冇人信；基金Ｐ講隻李寧（2331），當日係五個八，現在做緊十三蚊以上，至於左丁山講嘅中國海外，當時係三元八角，現價去到十蚊；其他不必講咯，總之全線上升。
○六年就易賺錢啫，因升得太多太快，○七年就難講咯，未必再有咁好彩。經紀Ｋ唔得閒出席一月三日嘅午餐，只係傳來口訣：「信者得救，勇者無懼，跳車要快，止蝕要狠（10%就cutloss）；十年一閏，人生難逢，唔玩就輸晒，想玩就要精晒！」經紀Ｋ日日為大戶、基金買賣股票，佢話太多liquidity，大勢沒法擋，唔買股票唔得，眯埋眼都要參加呢個遊戲。
講多無謂，冧把實際，佢推薦1800、3898、長實、新地、和黃；基金Ｐ呢，佢表示位高勢危，但○八奧運概念煞食，照去可也，一樣推薦1800、3898，佢隻基金已入晒貨，另外佢話要吼實588、694、1398、272；左丁山諗住唔會再有一隻688咁好彩，出貓問功課，大班Ｃ教埋44，名嘴青指示可買入517、667，呢兩隻股究竟係乜，左丁山唔多知，不過名嘴青話有搏殺潛質，唔怕冒險，可以博一博。
寫稿時，星期三剛收市先上網查吓價，哎吔，上述推薦股之中，3898、694、272、517喺一日之內已經升到嘭嘭聲，早知吃午飯前入定先啦。不過投資有風險，股價可升可跌，○七年中可能有大調整（李居明講嘅，之所以引述李居明，因為佢去年喺《狗年運程》一書中話明○六年十二月旺到七彩）。上述股票推薦，不構成買入建議！至今日一月六號為止，左丁山並無買入。