總監D約吃午飯，欣然赴會。總監D家有嬰兒，一歲左右，左丁山唔記得是男還是女，總之大男人覺得自己在外時間太多，親兒時間不夠，想話盡量減少晚飯應酬時間，但佢做呢個總監位，見少啲人都唔得，晚飯飯局點都推唔晒，同左丁山咁熟，梗係食午飯就算啦。
最令總監D傷神嘅，係得力助手辭咗職，回家湊女去也。佢位助手由小學至大學都係名校優秀生，出嚟做事，表現優異，本來前途似錦，可再上一層樓。但女士天生係母親性格，結婚生女後，湊女大過天，送咗個女入自己母校讀小學，驚佢成績追唔上，毅然辭職，日日睇住個女，替佢溫習，母愛係偉大嘅，可惜就咁犧牲咗得來不易嘅「職業上升軌跡。」
總監D不無感慨：「女生自己勤力，讀書用咗唔少心血，政府亦用咗好多資源津貼教育，令佢成才，我哋公司對培訓員工不遺餘力，但係到咗三十幾歲，步入職業黃金歲月之際，女生就回家湊女，辭職不幹。從宏觀角度睇，公共資源好似冇好好利用到。」
呢個真係重大宏觀問題，左丁山唔識答。香港女生讀書自小到大都叻過男生（平均成績計），大學一啲熱門學科如會計、心理等，女生搶去大部份學額。如果佢哋畢業後十零年就退出勞工市場，確係社會嘅損失，但中國人重視家庭多於一切，女士回家湊仔湊女，好難話唔啱嘅。不過，如果第一代叻女辭職回家教叻女，第二代叻女讀完大學又辭職回家教第三代叻女，第三代叻女成才後又辭職回家教第四代叻女……呢個循環點樣打破？好明顯唔係最適當之社會資源運用，只係為讀書而讀書啫噃。
呢樣嘢，不講為妙，森瑪斯講咗幾句話女性重視家庭，未必肯犧牲大量家庭時間留喺實驗室，所以大學理學院女教授人數比較少。講完就俾政治正確人士圍攻，然後被迫辭去哈佛大學校長職位。左丁山係咁意提吓，請勿誤會為盼！