踏入07年後港股大上大落，單日上下波幅閒閒哋達400點，兩日成交都逾700億，港股進入「大時代」。所謂居安思危，以史為鑑，到底有乜嘢會令到個市出現調整？
喺《XocatII討論區》，東虫以「乜嘢會觸發大跌市？」為題，叫一眾網民發表意見，佢自己就引述不具名嘅城市大學MBA課程主任話：「個主任話唯一擔心係泡沫化，股價升得太快，快到眾多大戶都認為賺夠，一齊拋售，玩死個大牛市。」
大戶賺夠一齊沽
非常理性嘅leoxi就列出3大觸發跌市嘅可能，「第一，美國經濟放慢；第二，由於06年第四季盈利表現勝預期，市場擔心去年基數高，07年盈利增長會因而放緩；第三，金價突然無厘頭急升。」peninsula拉遠啲，話：「出現一啲同美國911恐怖襲擊同等規模嘅恐怖襲擊！」
網友domerate簡單啲，「大跌原因可以好簡單，可能只係由股民嘅心理恐慌造成。」mafiashanghai就好理性咁話：「上海A股炒過籠拖累港股大幅回吐。」kkwong7606就畀咗個市場啲嘅原因，「call輪到期都得㗎！」
可能近期有雀仔驗到禽流感，屠房人員又相繼染到神秘肺炎，網友A_Nice_Man話：「個市炒到咁，港人對沙士教訓已經遺忘了……」佢仲特登引述報章報道，話廣州中山大學附屬第二醫院感染科入冬以嚟，接收咗唔少病因不明又發燒唔退嘅個案！
最怕係資金流走
班網友講到似層層，到底市場人士又點睇？東泰證券研究部董事鄧聲興話，佢最擔心唔係大家賺夠鬆人、唔係金價升跌、唔係打仗、唔係恐怖襲擊，因為呢啲原因太遙遠，始終同香港人有啲距離，佢最擔心係資金流走，「資金流走嘅影響將會非常大，其次係美國未有一如市場預期般減息。」
講開資金流走，上個禮拜四、五港滙持續偏軟，確實引起唔少人懷疑資金係唔係開始流走。有市場人士叫大家唔使咁擔心，上個禮拜滙市確實弱咗，但好在禮拜五股市仲有成700億成交，扣除禮拜四配股上板嘅成交，成交仲多過禮拜四大跌市個日，顯示低位仍不乏買盤，斷估資金仍未大舉流出咁話喎！