苗僑偉、劉德華、梁朝偉、黃日華和湯鎮業在80年代組成的無綫五虎將，當年如何巴閉已毋須贅述，總之是紅到盡，無人不識。當年三哥得意傑作有《飛越十八層》和《天師執位》等劇集。90年他離巢，開辦藝視眼鏡連鎖店，02年賣盤，傳聞他從商以來賺取過億元，然後大前年重返娘家，簽約無綫為經理人。
新人較難入屋
放眼無綫今昔，往時好戲如雲、人才濟濟，但現在好戲難求、人才凋零，三哥卻另有見解，他說：「80年代冇乜娛樂，除咗睇電視，TVB嘅捧人制度，今日開呢套劇係黃日華，聽日開嗰套劇就劉德華，八點劇又係佢，九點劇又係佢，好深入民心，嗰時記者報道集中電視藝員。
「對比𠵱家，多咗好多其他嘢，觀眾返屋企未必一定睇電視，可以玩電腦、上網，傳媒報道韓星、台灣、內地明星嘅版位好大，香港明星嘅版位得嗰啲咁多，比起以前差好遠，觀眾同藝人接觸層面少咗，TVB班新人要入屋就比以前困難。」
三哥續說：「以前TVB拍過咁多戲，經典嘅拍過晒，劇本題材翻炒咗咁多年，再演繹亦有難度，所以劇集要爭氣、傳媒又要爭氣。」
「好enjoy拍嘢」
昔日從商12年，三哥賺過蝕過，可謂成也風雲、敗也風雲，驀然回首，難免百般滋味在心頭，他說：「之前我出咗去，好似坐過山車咁，經過大風大浪，我永遠係睇目前、睇將來，唔鍾意睇番轉頭，唔想望番以前嘅成功失敗，以前嘅嘢係一個經歷，呢啲經歷同經驗好多人都冇，但𠵱家我係完全好enjoy拍嘢，演繹吓第二啲角色，再返TVB，整個製作冇乜大變動，所有工作人員、演員都係一個心態，大家係求好，我又唔係多產，一年一套劇，盡我能力做。」