寃寃相報何時了呢？曾志偉與容祖兒（Joey）早有積怨，近期不時你鬧我，我寸你，說話口窒窒的Joey日前在《勁歌》節目中，抵擋不住口才了得的志偉連珠炮發，終要由疼錫她的英皇老闆楊受成為她出頭。昨日楊受成罕有地出席時裝活動，公開指摘身為演藝人協會會長的志偉不應三番四次玩後輩，應該幫助後輩，讓娛樂圈更和諧；志偉也即時使出一招四両撥千斤，表示只是做節目搞氣氛，叫楊受成不要看得太重，今番老薑鬥老薑，難分難解。
曾志偉日前和容祖兒在《勁歌金曲》狹路相逢，志偉發揮其寸人本色，不但在揀選心水女歌手時，寧揀廖碧兒也不選「英皇一姐」Joey，語帶雙關暗寸Joey傾獎，令台上的Joey無力招架。
事件續有下文，向來疼錫Joey的英皇老闆楊受成昨日率領鄭希怡（Yumiko）和「解凍」復工的梁洛施到銅鑼灣出席Moiselle旗艦店開幕禮時，就開腔力挺愛將Joey。楊受成一副有備而來姿態，當記者問到Joey再次被志偉勁寸時，楊受成全程面帶微笑說：「坦白講，以佢嘅江湖地位，轉數咁快，查實唔應該對個後輩三番四次咁玩佢，咁係好唔應該，娛樂圈今時今日咁辛苦，大家應該互相扶持同幫助，呢個圈就可以和諧少少。佢係大人，佢（指Joey）係細路女，而且佢又係演藝人協會會長，身份應該幫啲後輩。」楊受成笑着斥責志偉，又大讚Joey沒有為是次事件不開心，也沒有向他投訴過。
自辯為搞氣氛
當記者追問會否找志偉傾一傾時，楊受成即避忌想走人說：「好嘞，係咁啦。」至於被問到是否覺得志偉應該道歉，楊受成說：「唔講嘞，你哋都夠料啦。」會否請成龍責備志偉？楊受成則謂：「大家以後和諧啲啦。」
志偉得悉被楊受成指摘後，他立即四両撥千斤，在電話中輕鬆地說：「唔好睇得咁重啦，個活動都係搞氣氛啫，我平時個人都係咁㗎啦，唔覺得有啲乜嘢喎。」
曾被志偉取笑過的Yumiko，提到Joey又被寸時，她表示自己也沒有怪過志偉，因為覺得他只是講笑，不過Yumiko也要撐Joey，故當問到是否欣賞志偉的風趣時，Yumiko即大叫救命不懂回答，並說：「好難答，玩吓啫，只係希望佢唔好繼續咁，應該支持我哋後輩，而且呢個（指亂講嘢）係佢風格。」
祖兒懶理是非
此外，祖兒昨晚在將軍澳電視廣播城出席《慈善星輝仁濟夜》的活動上回應遭曾志偉狂寸一事，她說：「自己唔想講最多，自己只係想好好工作，冇其他空間同心情去諗，對件事冇太大感覺。」但昨日下午其老闆楊受成出言力撐她，問Joey是否感高興，她說：「差唔多啦，好平常，入行咁耐，要顧及唔係呢啲是與非，自己唔想再講太多，唔習慣你一言我一語，去回應呢啲新聞做新聞。」對於楊受成直指志偉大蝦細，祖兒說：「前輩係要尊重，佢講乜嘢我冇資格批評。」
採訪：駱華齡、卓美娟
攝影：陳偉權、葉君海