睇見史泰龍（SylvesterStallone）拋個身出嚟再拍《洛奇》第六集《洛奇：拳王再臨》（RockyBalboa），真係好鬼欷歔，作為一個動作明星，60歲應該係時候安享晚年，自己都已經「成身鬆晒」，為乜仲要企喺個擂台上獻世？原因只有一個，就係佢同洛奇一樣，死唔肯認輸。 撰文：戶川淳
提起史泰龍，你可能只會記得佢啲肌肉，其實呢位大隻佬編導演三瓣都掂。30年前佢創作《洛奇》首集劇本時，仲係霉星一名，於是佢將自己嘅經歷及個人感情代入故事之中，令洛奇變成一個有血有肉嘅角色，結果齣戲唔單止令龍哥一舉成名，更令佢成為80年代荷李活最高身價巨星之一，之後四齣續集亦大受歡迎。
獲好評執身彩
可惜近年龍哥人氣大插水，雖然佢唔係等錢使，但唔想俾人話係過氣耆英，於是喺電影公司、家人及影迷反對下，毅然喺60歲之時食老本再拍《洛奇》。點知齣戲出到嚟影評同票房都不俗，美國上映兩星期已有近5,000萬美元票房（約4億港元），今次終於俾龍哥食番鋪尾糊。
慳住使老友撐
今集洛奇嘅處境同現實中嘅龍哥一樣，曾經威震一時嘅佢，今日已經人老珠黃，又放唔低以前嘅風光日子，最慘係洛奇老婆過咗身，個仔又同佢唔啱，令佢變成一個苦無寄託嘅獨居老人。點知有日洛奇睇體育節目，電腦模擬結果居然顯示，佢係世上唯一有實力打敗無敵新晉拳王廸遜（安東尼奧達化AntonioTarver飾演）嘅人，於是老對方足足一個開嘅洛奇，再次踏上擂台，向世界證明自己仲打得。
龍哥今次為咗償自己心願，不單受到身邊嘅人冷嘲熱諷，年屆花甲嘅佢仲要進行地獄式訓練操fit副偈，而且齣戲成本只得2,400萬美元（約1.8億港元），因此龍哥要慳住使，片中嘅拳賽場面，就係借用一場收費電視比賽嘅場地同觀眾嚟拍攝，連臨記都慳番。
不過今集都有唔少好友力撐，包括前五集都有參演嘅伯特揚（BurtYoung）再度粉墨登場，前拳王泰臣（MikeTyson）客串演出（本來佢仲話要做歹角！）；另外龍哥去到洛奇家鄉費城拍攝外景時，受到英雄式歡迎，都算老懷安慰。