美國人鍾意送禮，買禮品嘅開支已成為重要日常開支。調查發現，喺剛過去嘅聖誕節同新年假期，美國有56%老闆計劃送禮畀員工，但只有不足三分之一職員打算回禮，而且收入愈高嘅員工就愈孤寒。
喺《MSN討論區》，網民fionalover問：「臨近佳節，我同事會送禮畀老闆，博佢歡心，唔知我應唔應該向老闆送份名貴禮物？」cschin4答：「美國人幾時興送禮畀老細？應該調轉嚟，由老闆送禮畀員工先啱。員工送開禮畀老闆，將來年年都要送，條數好襟計！」
調番轉小心被告行賄
globalbiz話，如果職員感到「有壓力」，認為一定要送禮畀上司，或者驚冇送禮會俾上司秋後算賬，咁樣，佢嘅工作環境肯定有問題。「假如有同事向上司送禮，你可以唔使理佢哋，因為上司最終點睇你，主要視乎你嘅工作表現。」
Bellebboutique話，佢公司政策規定，員工唔准向同事或者上司送禮。如果要向上司表達心意，送張節日賀卡已經足夠。
美國為防範貪污，政府機構同大企業對「禮物收受」有嚴格規定。如果公務員接受禮物嘅金額超過規定上限，就可能俾人告，一經查實，會被嚴厲懲處。細公司就冇咁多限制，聽聞有人送埋啲好騎呢嘅禮物，例如脫衣舞表演門票、內衣、用過嘅化妝品等，認真搞笑。