徐子珊火辣皮手套
「平時我好少戴手套,今日呢一條裙可以戴其他頸鏈同手襪去配襯。呢對手襪係我媽咪買嘅,好似係喺連卡佛買,都要成千幾蚊,紅色真皮,入面係冷,所以好暖。其實平時我好少去買衫,自己又冇時間,所以媽咪負責幫我買,做我嘅形象顧問,你睇我就知道我媽咪都好潮啦!」
薛凱琪溫暖牌手帶
「呢條手帶係我生日時Daddy送畀我嘅,條手帶好特別,戴咗就除唔甩,除非用鉸剪剪,因為佢一索實咗就冇辦法除。我記得嗰時拍《學警雄心》時,導演要求我哋將所有首飾除低,所以嗰時我雖然已經收到條帶,都唔敢戴,拍完後就即刻戴,一戴就戴咗兩年。」
董敏莉限量熊仔鏈
「我好鍾意熊仔飾物,有個fans知道後,喺我入行後第一個生日,專登喺日本排隊買咗個限量版熊仔鏈畀我。雖然好鍾意,但太貴重唔敢收,不過個fans話香港冇得賣,仲有埋出世紙,好堅持要我收下。因為好有紀念價值,所以我都好珍重咁收藏,隻熊仔好可愛,襯衫一流。呢輪戴出街,仲特別有節日氣氛,因為佢夠閃。」
戴夢夢型仔Boxer褲
「呢條係Take5同YENJeans出嘅crossover牛仔褲,係啱啱喺日本買嘅新貨,而且仲係限量版㖭。我覺得個褲頭好特別,好似人哋專登露出boxer嘅褲頭咁,我呢條其實係男裝嚟㗎,女裝褲頭嘅花係藍色嘅,拍緊拖嘅可以一人買一條嚟做情侶裝,浪漫得嚟又有型。」
採訪、攝影:卓美娟、何永寧、楊潔雯