人比人、比死人。本來都不想比，但過去兩個月，晚上收看無綫劇《賭場風雲》，主角苗僑偉和歐陽震華並排而立的效果，又好難令人不比較。
苗僑偉（三哥），48歲，俊朗、高大配黝黑膚色，魅力十足；歐陽震華，46歲，髮線後移、肚滿腸肥的體態似足加菲貓。有歐陽震華襯托，更顯三哥瀟灑有型。
以前三哥從事眼鏡生意，傳聞曾賺取過億身家，男人有名有利又有儀表，就會有女人黐埋身，他的老婆戚美珍又一年圓潤過一年……沒想到三哥快人快語，坦承婚後曾經心野過，幸他懸崖勒馬，深明世上最好的，還是陪伴身邊17年的「何文田肥珍」。 撰文：朱倬誼
播足兩個月的無綫劇《賭場風雲》，昨晚終告一段落，劇集收視一般，但意外的是，彈出的並非劇中賭神歐陽震華、也不是飾演隱蔽青年的黃宗澤，而是飾演喬正初這亦正亦邪角色的苗僑偉。
承認曾經心野過
「苗僑偉幾型喎」、「佢keep得幾好噃」……這兩個月來，不少師奶觀眾都大讚喬正初「正」。講句公道話，48歲的三哥確保養得宜，至少沒有脫髮、沒有中年發福，以他現在的狀態，加上再戰電視圈後與漂亮女藝員有太多合作機會，要媾女不難，待在家裏的苗太戚美珍，要不要全天候昅到實？
三哥說：「咁多年嚟，大家係互相信任。拍戲會有靚女喺身邊，工作上會有接觸，太太做過演員會知道，拍完戲識得抽離角色，角色抽離唔到咪有好多老婆、好多女朋友？唔需要擔心嘅，大家都咁大個人，唔通咁都控制唔到咩，佢對我有信心。」
舉例說明之，是前年三哥和吳美珩合拍劇集《人間蒸發》時傳緋聞，三哥揚言太太不是醋娘子，並沒大家幻想的扭耳仔大興問罪，他說：「佢嘅角度係老公仲有啲魅力、仲有靚女鍾意喎，返出嚟拍嘢，接觸呢啲女藝人，影相、拍戲咁多嘢可以寫，傳吓呢啲冇得避免，冇得激氣，時間會證明係花邊新聞，好快會過去。」
從前的戚美珍如花貌美，曾幾何時靚絕無綫，但自從做了苗師奶、分別誕下如今已15歲的大女兒苗彤和13歲的小兒子苗俊後，她就一直控制不了走樣身形，口花花的譚詠麟還封她做「何文田肥珍」。其實做女人的，計襟老程度往往比男人輸蝕，依然有型有款的三哥，若說他婚後17年來沒有心野過，大把人打死唔信，估不到三哥竟爽快回答：「唔可以話冇，始終人嚟㗎，適當時候要控制到，答咗你啦，唔好再問！太太會明白，佢係明白事理嘅女人。」
「照顧佢一生一世」
那三哥現在對三嫂的情誼，會不會已經演變成一種責任？畢竟十多年的婚姻生活相當漫長，他卻即時許下愛妻諾言：「佢小朋友幫你生，年紀個個都會大，冇理由生咗小朋友就『劈』咗佢，我唔係咁嘅人，做男人結婚後係會承擔，跟你一齊生活咁多年，唔可以半途拋棄佢，呢個唔會係我！結婚嘅時候已經係一個承諾，我同太太經歷過好多風浪，梗會照顧佢一生一世。」
攝影：陳俊強
服裝提供：DAKS
場地提供：BULLDOG'SBar&Grill
