澳門除了酒色財氣，還有很多。愛刺激的，一落船直往陳冠希都跳的全球最高笨豬跳去吧。不愛做「豬」，去賭場歎幾日又如何？永利（Wynn）由美國財團創辦，擁拉斯維加斯經驗，嫌以往澳門賭場太烏煙瘴氣，來試試美國家庭度假式「娛樂場」吧，唔賭錢都可以去歎Spa，不過住一晚就要二千港元，無錯！澳門新消費場所不再平價，例如最新開幕，有成33間主題房的「帝國迷城」，唱一晚K最低消費要$15,000！
記者：錢靖雯 攝影：陳陶鈞 Model：Eva
永利有酒店有Spa
去年永利甫開業25日，即創下投注金額超過15億美元的紀錄，做街頭直選，永利得分亦高。澳門隨街都有娛樂場，永利為何能突圍？不願出鏡的日本遊客Kor說：「以前成日會去拉斯維加斯，不過𠵱家去澳門就方便得多了。酒店係貴啲（永利一晚住宿要兩千港幣）但近嘛，而且服務都唔輸蝕啫。」小記覺得服務人員都幾有禮貌，笑容又甜美。同行的ModelEva亦贊同，佢話：「行咗一朝想歎吓，其實我知裏面有Spa做，想去試吓！」年輕情侶、家庭未必花咁多時間喺賭枱，不少都當佢係度假酒店。永利設有600間豪華客房及套房、212張賭桌及375台電子博彩機。
永利（WynnMacau）
地址：門外港填海區先德麗街
電話：（853）28889966
笨豬Jump挑戰陳冠希
再嚟澳門又點少得去笨豬跳！好多人都話陳冠希，超，生出來有錢又靚仔之嘛。之不過，人家夠膽從61層樓、233米高的旅遊塔跳「笨豬Jump」，你無理由輸畀佢㗎！呢個旅遊塔有「亞洲第一的高飛跳」之稱，已經正式列入健力士世界紀錄，全球最高！據有關單位表示，至今跳嘅大多數係日本團居多，日本人真大膽，來到中國人地方挑戰我哋，今次真係國仇家恨都上晒頭，好，一於先單挑陳冠希，再戰勝日本人！
我綁安全帶做吓樣就得，咁高，齋望都好驚呀！
都唔係好驚，但係好快，已經第二次玩啦。
澳門旅遊塔會展娛樂中心
收費：$488/人（包括證書）
星期一至星期五:11:00am至8:00pm
星期六至星期日及公眾假期：10:00am至8:00pm
查詢：（853）9888656
吃京城第一湘菜
提起湖南，年長的總想起毛澤東；年輕的呢，喜歡吃的會想起「湘菜」。湘，即湖南，而「湘臨天下」就有「京城湘菜第一家」的美譽，在北京一共有3家分店，近日衝出大陸，第一家海外分店就設在澳門。師傅都由北京調來，保證味道正宗。講到呢度，認識湘菜嘅都話怕辣，咁不如試吓其獨家創製「海馬功夫湯」，經過24小時細火清燉，清香回味，師傅仲話男人食咗可以壯陽，女士可以通血管㖭。
海馬功夫湯$118/位
用海馬、瑤柱、雞腳等燉湯燉足24小時，上桌時用紫砂茶壺盛載。
國宴毛氏紅燒肉$78/例
既係「國宴」又用上「毛氏」兩字，可見其代表性。紅燒肉外表色澤紅亮，咬落果然肥而不膩。
湘臨鱷魚龜$388/斤
鱷魚龜肌肉中含有較高的氨基酸，對人體的延緩衰老有良好的促進作用。
湘臨天下
電話：（853）28886989
地址︰澳門氹仔蓮花海濱大馬路金都酒店娛樂場1/F
營業時間：11:00am-3:00pm，6:00pm-11:00pm
$15,000唱一晚K
無錯，主題房最低消費真係$15,000，不過咁大間K房香港真係搵唔到。迷城共有33間主題房，1,600呎以上嘅每間可容納30-50人，房內分別附設桌球、環迴立體聲影院、電子遊戲區等，朋友仔唱緊歌你可以喺另一邊打機、上網。設80吋大型投射銀幕、獨立洗手間。如果有30人使$15,000，每人$500，唔算過份！有煙民話，來澳門唱K最高興係可以一邊唱歌一邊「享受」喎！
帝國迷城
地址：澳門路氹金都酒店娛樂城2-3樓
電話：（853）28886988
街頭直選
賭民揀永利
美國遊客：我揀永利，感覺Relax啲，自然Win多啲啦。試過喺葡京輸錢，，但係都唔夠金沙輸得多。
溫生：輸咗呀！喺永利囉，唏！有賭未為輸，邊度跌倒，邊度爬番起身嘛，𠵱家再入去賭過！
羅先生：度度輸少少啦，永利就新啲，幾好。
方生：喺巴比倫贏少少，貪永利舒服，輸少少無問題！
方太：金沙燈光唔好，輸好多！好想去吓星際。
John：喺葡京輸咗80%落百家樂，玩老虎機就贏少少啦。
Steven：財神好，喺嗰邊贏過$1,000-$2,000，金沙輸得最多！葡京都輸。
