都話股市變化冇咁簡單，「跌市大成交」可能係「散水格」，但唔係一定係散水格，呢個只係其中一個可能性，話咁快港股又升番上嚟，成交仲有706.5億元，承接力一啲都唔弱，雖比前日成交少咗，但係下試支持位反彈嘅第一日，通常都係咁。
如果大家同意好友一路都掌握大局，咁樣昨日恒指嘅技術走勢就有啲「假」，前晚美股唔算曳，但港股昨日一開市就「嘜」落19890，跟住就下試10日線，好快又炒番上嚟，成個圖變得好靚，似好友「造圖」多過淡友攻堅。
個市尾段掃得好勁，啲股票唔係「錘頭」就係「破腳穿頭」，起碼都會有個「陀螺」或「十字星」，下個禮拜一應該係淡友捱打嘅時刻。
國內啲銀行股呢兩日跌得好急，但係喺大升市升銳退速係好自然嘅事，前日大幅下跌加埋昨日早段嘅跌幅，調整嘅幅度好深，開展反彈起碼會逼近前日嘅高位，破埋位又會有另一輪狂升。
中行C輪9457：中行（3988）昨收4.32元，早段曾落過4.05元低位，前日嘅高位喺4.60元，昨日連條20日線都試埋，企喺全日高位嗰頭收市，呈現「長尾陀螺」，下個禮拜一有機會上試4.60元，破位就睇5元。
早幾日介紹過嘅中行C輪9457可以番兜，昨收43仙，槓桿率10.1倍（有效6.7倍），對沖值0.67，引伸波幅31.5%，正股升上4.60元，9457唔會平過62仙，正股升上5元，隻輪會喺95仙樓上，正股跌穿4.80元止蝕。
俊樺