恒指衝破2萬點創新高，有地產項目發展經理出70個月糧！香港跌落谷底咁多年，魚翅撈飯嘅日子又返來囉！每逢地產股票興旺，無形中大家嘅荷包好似多咗錢，特別捨得使錢搵好嘢食！魚翅撈飯豪則豪但太俗氣喇！不如試吓做帝皇，來一頓滿朝御膳！以下介紹的菜式出自清朝皇帝，全部有根有據，仲有故事講！原來貴人豪門菜，唔係下下要鮑參翅肚，全部食廚藝手工！
記者：朱崇德
攝影：陳偉強
Model：Isabel
走上灣仔王子酒店「滿朝御膳」，第一個感覺好似去咗古董店；一出電梯𨋢門，放眼所見是兩幅人身般高的彩繪康熙和皇后畫像，紅布櫈、黑木枱椅、雕滿龍紋印章的明黃枱布，再加火紅的宮燈同木排壁畫，氣氛經過一番心思營造，感覺是一派古調皇庭風範！
溥儀御廚後人做顧問
做食版經驗給我第一個警覺，應該食裝修乎？吳志恒總廚適時走馬上場：「餐廳叫滿朝御膳，所以我哋所做全部都係清朝帝皇菜式，資料來源主要來自末代皇帝溥儀的御廚後人，聘請到來作為顧問廚師，再加專人作歷史考究，所以每道菜都有根有據，兼且講得出係邊朝帝皇菜式！」
康熙、亁隆、慈禧太后多道皇庭古菜順序而出，精緻嘅色相惹人喜愛，濃重的香氣及味道衝擊着味蕾，雖則並未多見甚麼鮑參翅肚珍貴用料，但正所謂食材普通，至考師傅手工！「每道菜都可以講係『工夫竇』！就以碟上簡單一個果花，都可以叫我雕上半個鐘！」
學師曾做大滿漢全席
「𠵱家香港多數做新派中國菜，果雕咁嘥人手時間，好多舖都唔願做，不過我學廚30多年，經歷最深刻是在國賓酒樓做學徒時，跟名師梁澡做大滿漢全席；時屆1976年、食足3日2夜，當年時價10萬元1圍，猴腦、熊掌、鶴舌，今日嘅香港真係冇可能再做到！大滿漢是僅此香港的一次，小滿漢香港都擺下不少次！」。
由傳統帝皇菜學師，到今日做帝皇菜式，可能是一種緣份，更重要是早已學得一手精巧的廚藝，其他食店想作鸚鵡學舌，只怕照抄照煮都不能。
康熙賜食$158
康熙賜食上枱，食器一片金碧輝煌盡顯皇朝氣派；炒雜使用野味食材，野雞柳、鷓鴣、火腿及松茸菌絲，野味肉絲粗切，食出肉香肉汁，加點點松茸菌絲配大葱絲伴食，口味清新去油膩；謹記食肉時，隨餸有個北方傳統主食──奶油餅，奶拌麥粉亁煎，香口兼麵粉味極出。
奶油餅雖厚，但極軟身！捲成雪糕筒狀，放入食材即可食用。
出處：
話說康熙視朝中大臣有如親兄弟，在一次的祈雨大典中，將搜獵回來的禽鳥作菜，賜予同行的大臣食用，故名「賜食」！
宮門獻魚$148
香港腹花魚難尋，現多以桂花魚取替；不過近月國內桂花魚又出問題，為食客安心，改以青斑代替。魚頭魚尾先切起炸香作碟飾，魚身以丁方吋厚切起球，輕煮以保肉身嫩滑及封鎖肉汁；碟底是以野米、蝦米、魚茸粒、菜脯所炒成的香飯，野米清香有咬口之餘，配蝦米鹹香及魚粒的鮮美，一道菜已有餸有飯。
出處：
康熙微服南巡至宮門，在當地小店品嚐了一道「腹花魚」（魚叫池邊花，故名腹花魚），因極愛其美味，連連吃下兩尾；食後感覺菜名不夠雅致，旋即在店內題字更名作「宮門獻魚」，菜式自此揚名天下。
亁隆戲蟹$368
原隻大海蟹全拆肉，拌入火腿提味，以增其鮮香；再以焗蟹蓋的方法，令入口更甘香。食肉時仲有一個春卷皮作餅底，面放伊麵及蟹肉同食；入口蟹肉香濃，外側則甘脆香口，感覺有如食緊脆身的蟹肉伊麵。傳統伴碟仲有一個以南瓜、薯茸及青椒做成的面譜，「戲」蟹之名可能是由此而來。
拆淨的海蟹，仲會原隻砌在碟面，大家可見廚師的巧手廚藝。
出處：
亁隆皇微服至玉山館，廚師本想預備一道海蟹菜式以款貴客，但亁隆爺卻嫌食蟹太麻煩，並表示多多錢都肯畀，只要唔使除殼咁麻煩，於是廚子想出這道拆蟹菜式。
紅娘自配$168
中蝦去腸切成鳳尾狀，底部釀入豬肉，中間則配以番茄里脊片；入口時外部炸得甘脆，蝦肉鮮美，豬肉以增其咬口及肉香，拌以一個酸辣汁，感覺更惹味；由於巧手＋造型精美，據知是慈禧最喜愛的御膳菜式之一。
出處：
宮中規定，年過22的宮女即可出宮嫁人。話說慈禧太后身邊有位御廚梁會亭，有姪女年過23還待在太后身邊，故以此菜為喻，婉轉相告放其出嫁。
養心貴妃雞鍋$68
以花膠、瑤柱、靈芝菇、雞肉等滋陰養顏之食材做底，加入自家新鮮磨製的南北杏汁清燉，做法感覺有點似杏汁燉燕窩，不過靚花膠的骨膠原特高，對美肌白滑尤為有用。
出處：
慈禧太后最喜以牛奶浴作護膚美白，而其他妃嬪有見及此，而想出了這道美食作美肌、美顏之用。
睇路搵食
滿朝御膳（31881212）
地址：灣仔謝斐道303號王子酒店1樓
座位：90個
營業時間：星期一至六12:00nn至3:00pm、6:00pm至11:00pm
星期日6:00pm至11:30pm