以賣倉底貨出名嘅華懋，最近谷緊碧濤花園第二期貨尾，平均呎價超過4000蚊，而二手呎價𠵱家大約二千幾三千蚊咁上下。由於碧濤享有沙田勁靚馬場景，打動咗網民個心，wavegom喺《香港討論區》問大家點睇呢個屋苑。
自住可以考慮吓
canphyto唔知係咪住喺附近，好詳細咁列咗啲優缺點出嚟，優點好似位置好安靜、純住宅、大平台花園、馬場及城門河景、車位特多兼有單車位等；缺點就係實用率低、用料差、購物不方便等。結論？就係買嚟自用可以考慮咁話。
Hkmushroom就講到好似係碧濤住戶咁，話個屋苑「OK㗎，夠平。用料差？但你買咗都會裝修啦，未試過漏水、爆渠。靜、景靚、交通方便。」仲話：「第一期個價好穩定，啲人搬入嚟就好少搬走。第二、三期一手『小甜甜』（華懋老闆龔如心）定個價好硬，同一景觀，第一期同第二、三期相差多過100萬，但第二、三期公眾地方靚好多。」簡直讚不絕口，絕對有潛質做賣樓或者地產經紀。
不過，亦有網友大數碧濤缺點，Queen_Victoria認為「隔籬翠湖正好多，90%實用，千一呎樓大過新樓千四呎。」hkng888亦都講：「有線個驗樓環節，碧濤好似係排第一『差』」。
碧濤花園座落安景街，隔籬就係沙田第一城，鄰近仲有兩組私樓──新地濱景花園同恒基翠湖花園；離第一城最遠嘅碧濤花園，分3期發展，第一期91年入伙，發展商手上已經冇乜貨尾；第二、三期都係93年入伙，但就有唔少單位未賣。至於翠湖花園，89至90年入伙，𠵱家市價三千幾四千蚊呎，係3組私樓中最貴。至於樓齡最舊嘅濱景花園，88年入伙，市價同碧濤花園差唔多。