香港這個國際都市有不少富翁，但要他們如美國股神畢菲特（WarrenBuffett）和微軟主席蓋茨（BillGates）一樣將大部份身家捐出來做善事，談何容易！慶幸香港演藝界還有一個形象親民的周潤發深明取諸於民，用諸於民的至理。至今膝下猶虛的發哥，表示身後會將家財捐出來幫助有需要人士。可敬！可敬！ 撰文：陳月媚
在周潤發生命中有兩個女人對他很重要，一個是周媽媽，另一個是太太陳薈蓮。前者在做人處事上，對他有深遠影響，後者則為發哥的事業出謀獻策，為他開拓了國際星途。不過兩個女人常被傳婆媳之間不協調，究竟孰真孰假？且聽發哥道來：「兩個都係好勤奮嘅女人，基本上佢兩個相處冇乜問題，阿蓮成日都有送禮物畀媽咪。未結婚時，我嘅起居飲食全由阿媽照顧，𠵱家就由老婆負責。」
學懂知慳識儉
雖然跟媽咪分開住，不過母子仍然濃情，除了每星期見面，發哥每日都會打電話給母親聊天最少一個小時，周媽媽總是不厭其煩地教兒子做人之道，發哥說：「其實我嘅做人處事之道，係受到阿媽好大影響，阿媽以前養大我幾兄弟姊妹係捱得辛苦，所以佢成日叮囑我唔好亂使錢，連工人同司機都唔肯畀我請嚟服侍佢，阿媽話要親力親為勞動吓，身體會好啲，佢真係冇得頂。」
母親樸實的生活態度，對發哥起着潛移默化的作用，今時今日發哥縱有豐厚家財，但仍然知慳識儉，好像家中的電視已經用上10年，修無可修下才捨得更換。除了節儉，周媽媽又常教誨他不可以佔人便宜，發哥說：「有次我同阿媽喺一間相熟水果檔想買水果，我隨手攞一粒提子嚟試食，試完之後，我同阿媽講：『唔甜嘅！唔買啦！』但阿媽話唔得，一定要買番磅，食完人哋嘅嘢，點可以唔買就走咗去。」
發哥最佩服母親的豁達人生觀，連身後事如何處理也交代清楚：「阿媽話到佢兩腳一伸時，連喺佢墳頭喊都唔使啦。一切簡簡單單就得，最緊要係生前對佢好，死後做乜佢又睇唔到，所以唔好搞咁多嘢！我覺得呢樣係至理名言，愛你身邊嘅人，最緊要喺佢在世時識得珍惜。」
發哥珍惜母親，對妻子也同樣愛惜，發嫂除了照顧丈夫的起居，還要擔當經理人角色，一身兼數職，幾個月前終於操勞過度，在北京患肺炎入院。對於太太的健康狀況，發哥一直很擔心：「佢同阿媽一樣係唔可以停落嚟，就算我勸佢唔好咁操勞，佢都唔會聽，就算我𠵱家退休唔做嘢都冇用，因為佢一樣會搵嘢嚟忙。不過呢次入院，佢知道自己身體已響起警號，我諗佢會識驚啦！」
估計身家10億
自從女兒不幸夭折，發哥夫婦一直沒計劃再生小孩子，貴為國際明星的發哥，其身家保守估計約有10億，將來他倆夫婦身後留下來的財富又如何處置呢？發哥表示：「我同老婆有共識，打算將啲錢捐晒嚟做善事，既然取諸社會，用諸社會都好應該。我冇打算留畀親人，因為屋企人大致上已安頓好，我覺得將啲錢幫其他有需要嘅人仲有意思。但點嘅形式仲未諗好，老婆想搞個慈善基金，佢已經搵律師諮詢緊意見。」
近幾年來發哥很注重養生之道，雖然饞嘴，但開戲前總能減磅，究竟他有甚麼收身之道？他說：「其實冇乜特別，都係朝早去行吓山同做吓拉筋運動囉！冇咗個膽後，腸胃冇以前咁好，平時真係食得好清淡，夜晚嗰餐就唔食澱粉質，好似平安夜，屋企開party燒嘢食，我就叫工人蒸條魚、煮個菜就算，燒嘢食我都唔多好，因為冇乜益，但我會幫手燒招呼朋友。」
攝影：仇志德
