西甲今個星期重開，兩支歇冬前已經有好表現嘅球隊畢爾包同桑坦德雖然作客，不過形勢上「坐和望贏」，讓球盤不妨一早落注。
畢爾包呢支地方色彩濃厚嘅球隊，由前艾拉維斯教練文尼執教果然有起色，歇冬前3仗取得2勝1和，難得就係搞番好條後防線，強如薩拉戈薩都入唔到佢波，講真博下盤首先一個條件，就係隊波守唔守到，畢爾包呢層就畀到信心大家；馬略卡最為人熟識，就係佢個小島主場，不過今季主場威力已大不如前，9月24日贏波後，到𠵱家都未贏過，不過莊家始終技術上都開個主隊讓平/半盤，睇嚟臨場畢爾包會落飛，打到平手都唔出奇，下盤早捧有着數。
桑坦德又係正牌搵食波，近7場作客只係輸過1次畀皇馬，施積呢個長人中鋒坐鎮，真係唔易應付；利雲特唔經唔覺已經7場不勝，睇埋入球數字更加唔多開胃，近7場都未試過一場入多過1球；𠵱家開出平手盤，桑坦德只要入1球，基本上都唔使輸，絕對博得過。
查爾頓頹極吼森林
周六以英格蘭足總盃為主打，英甲嘅諾定咸森林，主場就對英超嘅查爾頓，表面上雙方相差兩級，不過查爾頓護級心切，之前聯賽盃都可以輸畀乙組仔甘韋比出局，今次作客森林，再輸都唔出奇，森林主W可以一早落定飛。文：牽牛