鄭嘉穎喺寶麗金時代曾經同玉女王馨平拍過拖，但最終因王馨平父親王羽棒打鴛鴦，而分手收場，如今女方已嫁為人妻。昔日寶麗金嘅宣傳人員阿龔前晚結婚之喜，喺尖沙嘴朗廷酒店設宴款待親朋戚友，王馨平帶埋老公到場恭賀，不過一見現場有記者採訪時，即顯得好避忌，問佢送乜畀阿龔，佢話送利是，之後就雞咁腳走。
寶麗金歌手聚首
後來大概8點半，西裝骨骨嘅鄭嘉穎單拖到場，有工作人員喺門口迎接佢，問佢知唔知道王馨平喺上面時，佢即時愕然，身旁嘅工作人員即時代答話：「咁我哋係寶麗金吖嘛。」鄭嘉穎先識得答：「我哋係寶麗金吖嘛，阿龔以前幫過我。」
另外，前晚到場恭賀新人嘅圈中人大部份係昔日寶麗金嘅歌手，包括黎瑞恩、湯寶如，Beyond嘅葉世榮同黃家強，仲有何超儀夫婦等等。
