英特爾（Intel）果然英明神武，前日美股3大指數在其「力拔山河」下全面報升，不然道指和標普500指數肯定無運行。美股炒到江郎才盡要靠一沉經年的TMT（科技、傳媒、電訊）照住，好像港股急將要錢唔要樓的地產股拿來力托一樣，大戶招數層出不窮，目的為何，請利用weekend細心諗吓！
「大龍鳳劇團」幾時正式落幕，恕筆者沒有水晶球，無可奉告。只知「兩個點、一條線」的其中一點已見想劃清界線，自避嫌疑乎？然則「大龍鳳劇團」還須死撐，是大家之前景都相當秀麗，預期「觀眾」還會魚貫入場，抑或玩到樂極忘形，欲罷不能？
新年伊始，人人都想攞個好意頭，環球股市差不多在首個交易日都開出紅盤。港股衝閘博懵爆上。歐洲在港股感染下，趁「火車頭」（美國）發生故障（悼念前總統福特無市）也勇闖高峯。美股就算跟住表演坐過山車絕技，都能力保不失（但只限擁有30隻「天」的道指而已）。日本仲犀利，出到金豬獻瑞，拍晒手掌（好似神打上身）都叫上（升），果然求仁得仁。
然而捱得一日捱唔到第二日，全部在港股的「帶動」下見「紅」，昨日說也奇怪，亞太歐股市絕大部份玩「潛水」，只有「劇團」兩老倌（港股、美股以前晚收市計）「深深雙印」（印度和印尼）決定留在岸上（無跌），果然同心！
世事沒有對錯，只有幹與不幹，只有余等分析員、評論員有對錯，因為唔係睇啱，就係睇錯，因此常成為惹火尤物，為甚麼？皆因「套戲」唔係余等「揸fit」者也，故只有斷估，然則你估揸fit嗰個唔辛苦乎？哈哈，所以還請海內外朋友多多包涵，別將小弟上述「劇本」拿來以主觀願望評對、錯！