沙田體院為08北京奧運的馬術項目改建前，運動員出身的方力申（Alex）日前重遊舊地緬懷一番。Alex從前在體院不分晝夜練水，早已視之為第二個家。如今第二個家要拆，Alex立心在樂壇幹一番事業，不過他自嘲未夠班，要下一番苦功，總算有自知之明。
運動員出身的方力申日前趁沙田體育學院為08北京奧運的馬術項目改建前，重遊舊地緬懷一番，他特別珍惜那裏的一花一草，更希望能得到印有4號的跳水台收藏紀念。
Alex說：「體院可以話係我嘅褔地，18歲喺度參加分齡賽，八個項目我拎晒金牌，加上以前經常喺度練習，我當正呢度係第二個屋企，𠵱家要拆真係好唔捨得。」
感激姑媽照顧
重遊體院期間，Alex主動要求與年紀小小的泳手合照，更一起做熱身運動，看着天真爛漫的小朋友，勾起了Alex童年的遺憾，他慨歎說：「我喺美國讀書嗰段時間，表哥每日朝早5點半車我返學練水，姑媽夜晚幫我補習英文，中學畢業時全部同學有多謝屋企人，偏偏我太緊張，唔記得多謝姑媽、表哥一班親戚，直至佢哋車我返屋企嘅一個鐘頭車程中，冇人同我講過一句嘢，我先知道自己錯。呢幾年我比以前懂得人情世故，今時今日我唔知點同佢哋講番件事，希望佢哋唔好怪我啦！我心裏一直好感謝佢哋對我嘅愛護，相信𠵱家嘅我唔會再犯同樣錯誤。」
自知欠缺實力
覺悟的Alex更懂得把握將來，他說：「當我喺泳壇做咗哥哥，走到樂壇做新人，睇住許志安得獎時嘅廚房宣言，佢經過15年努力先有成果，所以我唔會好似以前咁擔心，一定會對將來有憧憬，好想將呢個工作作為我嘅終身事業。我知道Paco（經理人黃柏高）對我有好高期望，唔可以辜負佢。嚟緊出嘅唱片，就係講以前同𠵱家嘅對比，相信𠵱家嘅我比以前更充滿信心，但喺實力方面仲要下啲苦功。」
採訪：王連連 攝影：陳俊強
髮型：VincePang＠ILColpo
