苗僑偉重返無綫，先後與多位新晉小生合作過，到底時下小生好抑或當年五虎勁？原來兩者在他眼中完全不一樣，且讓三哥「說三道四」，評評吳卓羲、黃宗澤和馬國明這三位新紮小生，還有論盡五虎拍檔劉德華、梁朝偉、黃日華和湯鎮業。
憶四虎：劉德華 勤力執着
「佢比以前更加成熟，做嘢認真，好執着，但𠵱家佢識得放鬆自己，打吓保齡，佢冇變過，真係好勤力，可以每日做三個宣傳又接工作又接戲，佢一路有啲運氣，加上真係勤力，所以保持得耐。」
憶四虎：梁朝偉 乜都有晒
「唔係經常聯絡到佢，偉仔乜都有晒，佢活喺自己嘅世界入面，都開心嘅。」
憶四虎：湯鎮業 北上辦學
「阿湯大部份時間喺內地，佢喺北京搞演藝學校，搞得幾好，耐唔中返香港會電話聯絡。我覺得佢喺演藝幕前上應該仲有發展空間，等待緊一啲機會啦。」
憶四虎：黃日華 好識享受
「佢好識享受人生，追求過往失去嘅空間，唔知仲要追求幾多年，但佢係開心咗，冇以前咁憤世嫉俗，耐唔中出嚟飲嘢時，會問『你唔係退休呀？咁後生，幾時先得死呀？』我都唞咗成10年又做吓嘢，又係另一種新享受。」
評後輩：馬國明 勤力有火
「馬國明都好，呢個後生仔好用心、好勤力，已經係成功第一步，勤力好緊要，見到個人會好精神，好想去做嘢，佢係有火嗰啲。」
評後輩：吳卓羲 需時浸淫
「Ron條件好好，演戲需要時間去浸，佢有外形，識得唱歌跳舞，堅持落去一定會成功，工作態度亦都要正確。」
評後輩：黃宗澤 隱蔽青年
「佢好尊重前輩，係一個孝順仔，一個人孝順都唔會衰得去邊。演戲嚟講，佢幾有潛質，仲後生，大把時間去浸，Bosco喺呢個圈裏面，係個隱蔽青年，觀眾對佢幾受落。」
