噚日個市早段相當之恐慌，瑞銀話睇淡保險股，加埋上海A股跌，隻隻中資金融股都裂口暴跌，國壽（2628）同平保（2318）係重災區，其後交行（3328）率先止跌回升，個市亦都升番轉頭。
下晝地產股升到飛起，龍頭新地（016）帶番個市上去，氣氛轉好之下，中資個別行業股輪流炒起，最強首推電力股，大唐（991）同中國電力（2380）均升約9%。此外，青島啤（168）升逾10%，青島啤近期表現咁勁，除咗係行業輪流炒之外，有經紀話，奧運概念股已經靜靜地起革命。計一計數，唔經唔覺已經到07年，08奧運還會遠嗎？奧運概念股最先令人諗起北京首都機場（694），昨日升3.5%。
一卡通潛力大
其他相關股當然唔少得北京北辰（588）同埋首創置業（2868），至於同運動用品有關的主要係李寧（2331）同埋永嘉（3322）。其實食正概念仲有北京發展（154），集團最近以每股1.1元配售9800萬股新股，集資額1.05億元，市傳和黃（013）前高層馬世民都有份認購。
北京發展目前主力發展北京一卡通、北京市軌道交通領域拓展項目、及持有55.05%衝浪平台軟件（8178）股權，唔知係咪子憑母貴，噚日連衝浪都衝咗上去，升35%。集團現持43%的一卡通，北京地鐵同埋北京巴士則分持33%及15%股權，自從去年中北京市以一卡通全面取代公交及地鐵月票後，一卡通開始在所有公交、地鐵及近半數出租車全面使用，截至9月中，發卡量已達430萬張。一卡通即係香港八達通，明年奧運大量人流車流，唔使講一定係奧運概念股重要一員。
歐陽風