昨日恒指及H股指數急跌400點，不少網友認為大跌市加大成交，似乎出貨多過震倉，相信未來調整空間會好大；但亦有人指尾市有買盤，恒指又守得住2萬點收市，所以未驚過。不過，喺《Uwants討論區》亦有網友指出，突然出現大跌市，覺得好心寒，而且要被迫「坐艇」，賬面蝕唔少。
網友beeyeung說：「好慘呀，投資組合帳面已經蝕咗10%。」網友matthew100007更大喊：「噚日入市轉眼無咗5000元，以為油價跌會利好航空股，所以買咗3隻航空股，結果勁蝕，決定半年唔買股。」網友koalababy19指出：「中資銀行股跌得好急，我買咗2000股招行（3968），坐緊艇。」網友HongKong亦稱：「今次真係狼來了，大戶獲利狂出貨，恐怕起碼要等一兩日先會反彈。」
另方面，網友darkbat69則笑言：「之前牛市連升多日，𠵱家只係跌1日就瓜瓜嘈，學咩人玩股票。」網友des說：「唔使咁灰，我都坐緊艇，頂多調整一千幾百點就無事，如果唔等錢用，可以繼續持貨，遲早一定升番。」