港股踏入07年連續兩日急升合共450幾點，激情過後，噚日卒之冷靜落嚟，調整咗380幾點。不少股民噚日走避不及，受咗少少傷。其實醒目嘅股民喺前日就知道股市會下跌，點解？因為大藍燈籠高高掛囉！
所謂藍燈籠就係話當呢一隻股票嘅股價上升時，恒生指數之後就會見頂回落。華華聽好多資深股民講，恒生指數嘅藍燈籠係電訊盈科。
前日電盈無端端升咗超過2%，港股前日就已經好波動，噚日早段電盈繼續升，恒指就開始腳軟。後嚟恒指愈跌愈多，電盈股價頂到尾段3點幾先至跌，全日有9億銀成交，認真巴閉！無端端急升，電盈之後出番個不明股價升因嘅公告，好似電盈咁出通告嘅公司至少有18間。
翻查分析員嘅8號仔報告，10份中，10份都唔建議人買，花旗仲正，直頭選佢為DogsoftheHSI，咁邊個咁抵得諗入市買電盈呢？正常邏輯推斷，好多人估係8號仔主席李二少啦，無他，淨係上個月佢都7度增持！
H股與紅籌各有代表
講開8號仔，自從賣唔成盤同埋二少高呼我愛真民主之後，靜唔夠1個月，又俾台灣地震震番醒，海底電纜斷纜係operator都受影響，但唔知點解又只係得佢俾人插，仲講到啲電纜係佢哋咁，只可以講，有個咁惹火嘅老細，8號仔恐怕要繼續樹大招風！
講番大市，除咗8號仔，響H股指數同紅籌指數都有藍燈籠，前者係東北電氣（042），後者係粵海投資（270），今日呢兩個指數跌，大家有冇留意佢哋嘅表現呢！
[email protected]