離開咗美聯半年嘅冼杜強，啱啱響元朗開咗間「建富物業」大展拳腳。
噚日華華去賀開張，順道八吓邊個開水喉照住，原來幕後老闆係方姓大陸廠家，以前冼杜強幫佢做過唔少買賣都有斬獲，方老闆一直都想搞番間代理行，於是決定搵冼杜強幫手打天下。
冼杜強話，自己響元朗長大，同街坊街里熟晒，響呢度開舖，簡直冇難度。佢話，雖然大本營響元朗，但邊區生意佢哋都做，啱啱就幫一個投資者，響旺角道買咗個180呎舖，近1000萬，仲話公司已經有盈利㖭！
方老闆掟咗1000萬出嚟，目標係五年內成為第五大代理行。佢信心會唔會大咗啲呢？唔怕俾大行趕絕咩？冼杜強就拍心口話冇有怕，佢話大行着數在新盤嘅廣告宣傳，但其實細行有本事嘅話，都可以做到刁，加上佢哋主攻二手，夠晒穩打穩紮。
其實，世事無絕對，大家一齊落足眼力，睇吓佢點打呢場持久戰喇！