聽完藝術B講，返到屋企立即搵番本十二月二十三號嘅《經濟學人》，第一一○至一一一頁講後現代主義與現代營銷。篇文章話後現代人（pomos）嘅著作好難讀，好多人會讀到瞓着覺，因為福柯（Foucault）講過，文字寫到非常艱深先至會有人特別注意喎！唔怪得啦，書架上一共有四本福柯與Derrida嘅書，左丁山每次揭幾頁就情願睇番電視。有一次同肥仔K傾福柯，肥仔K話佢喺美國大學上現代政治理論之時，福柯係指定讀本，大部份美國同學都睇唔明，亞洲學生啲英文冇咁好，更加不知所云。
好嘞，《經濟學人》言簡意賅咁介紹pomos理念與現代營銷嘅關係。Pomos本來鄙視消費主義，批判資本主義，要打倒資本主義，但佢哋對現代社會之解構極為深刻，完全評估正確。所以資本家剛好利用pomos之見解，作為推銷，包裝及設計產品嘅方法，譬如Nike宣揚個人反叛意識，我行我素（justdoit）；六十年代成長嘅左派學生在八十年代成為「反企業」企業家，如維珍航空嘅布蘭森爵士，BodyShop嘅AnitaRoddick，後來又與市場營銷之nichemarketing結合，令傳統百貨公司（包羅萬有式）大受衝擊，當今最成功嘅例子係西班牙時裝店Zara，款式不停轉變，速度之快有如pomos鼓吹永恒革命，英國牌子Accessorize專門推銷頸巾，珠寶首飾俾一啲唔係幾有錢嘅OL，大大成功……
諷刺嘅係，福柯等人憎恨資本主義，但福柯喺一九七七年一月一次最後講課中，叫學生讀海耶克，如果佢哋唔想俾人管治嘅話！福柯與海耶克學說雖然互不統屬，但竟有共通之處，就係雙方都追求個人自由，自政府及權威控制之中，解放自己，大家都着重個人選擇與個性之發展。
新左派社會主義與保守派自由經濟學說於是成為當今消費市場嘅主流，講求niche選擇，個性，表現自我獨特性。藝術邦話，pomos設計理論，大致如此，唔明白嘅話，新產品打不進市場。諗真啲，iPod大勝MP3，未必以科技取勝，而係靠產品外形與顏色好鬼pomo。