唔知係咪歇冬放假玩到心散，上半季有好表現嘅球隊，通常會大跌watt，上季係奧沙辛拿，今季會係邊隊呢？
西甲今季比上季精采，最少有隊西維爾同巴塞爭吓！只係踢咗半季，可以問鼎聯賽冠軍嘅球隊，今季出奇地多，就算係華倫都可以憑狠勁壓過西維爾，所以今季西甲真緊湊！
薩拉戈薩對西維爾大家點睇？會唔會好似幾個月前，西維爾首次喺香港有直播時嘅心態，一面倒支持佢哋？後果嚴重呀（嗰場波西維爾和波）！今晚呢場波，主隊有廸亞高米列圖呢位射手在陣，西維爾唔係贏硬㗎，我要入球「大」算啦！而另一場波，我嘅愛隊皇蘇一直沉淪，情感上，我覺得佢下半季會反底，因為我熟悉呢隊波，佢嘅實力係無理由降班，大家可多留意！
紅軍兵工廠難分高下
至於足總盃利物浦大戰阿仙奴，講數據、近況，大家都咁好！紅軍就主場不敗，客隊有亨利復出就大炒對手，睇落都幾五五波！
最後，英超榜首嘅曼聯、車路士贏波應該冇難度！反而，大家可以留意布力般流浪，慘敗畀阿仙奴後，近況相當好，麥卡菲、朗達腳風幾順，博得過！
周鵬
商業1台《球迷集中贏》主持
電郵：[email protected]