投資特攻隊今個周末重點向足總盃第3圈秩序埋手，揀嚟全英超聯球隊對壘戲碼，推介博主隊樸茨茅夫專心爭盃，一舉擊敗要顧住聯賽護級嘅韋根。冷選則博另一主隊普雷斯頓，開出近4倍「主勝」。華度
坦白講，季前對於樸茨茅夫呢支南部球隊嘅前景抱懷疑態度。首先領隊哈利列納過往無錯係有豐富執教經驗，但韋斯咸喺哈利列納手上多年，除咗出過一批英格蘭國腳之外，戰績上就來來去去都冇乜突破；樸茨茅夫今季又多新埋班球員，照計一時間好難話踢得出預期水準。
樸茅聯賽主場曾勝1:0
但踢到𠵱家季中，不得不承認「睇錯」佢哋。表現對辦不特止，經過呢個聖誕新年快車檔期洗禮後，仍然喺聯賽榜保持住前列位置；一班主力輪流入波，季初有簡奴做主角，最近就輪到馬菲泰萊發威，維持住個入球率，唔係靠「符碌」。
聯賽成績算係達標，樸茨茅夫絕對有力專心今周末展開嘅足總盃賽事。佢哋喺第3圈雖然抽到要對番同屬超聯嘅韋根，但有主場之利，以及聯賽首循環曾有主場贏韋根1:0前科支持。事實上，韋根呢支上季升班後，即有神奇表現嘅球隊，近況頗沉，連輸5場，已經喺聯賽榜中游，跌咗落去第17位，捲入護級漩渦。
韋根傷兵多護級要緊
更不利嘅係，剛宣布主場波飛要進一步減價嘅韋根，同時受到傷兵問題困擾，中、前場主力人馬亨利卡馬拉及舒卓拿，今作客樸茨茅夫仍然倦勤。照睇領隊祖維爾，當前要做好嘅，相信係避免傷兵情況繼續惡化，影響往後聯賽護級部署。話晒球會老細嗰間體育用品公司，呢兩年藉球隊打上超聯而聲名大噪，絕唔希望球隊上嚟超聯兩季，就坐「升降機」跌番落去英冠嘅。今場一於捧全力以赴嘅主隊樸茨茅夫開W晉級。
冷選方面，全英冠球隊對壘嘅另一場足總盃第3圈秩序，普雷斯頓主場有望承接今季兩鬥新特蘭俱勝之勢，再贏一場，為大家帶嚟近4倍嘅「讓球主客和」「主勝」。
投資特攻隊金句
樸茨茅夫今季一班主力輪流入波，季初有簡奴做主角，最近就輪到馬菲泰萊發威，維持住個入球率，唔係靠「符碌」。