陳凱歌開拍電影《梅蘭芳》講咗好耐，之前傳聞由梁朝偉做主角，據內地消息稱，套戲籌備得七七八八，陳凱歌定咗5月開鏡，拍到10月，喺北京同上海取景，梅蘭芳個仔梅葆玖都整理晒父親嘅資料，無條件提供畀陳凱歌參考，不過梅葆玖話希望男主角唔好太港台化，因為要用原人原聲演出，唔可以配音，梁朝偉嘅普通話唔標準，唔係咁適合，有傳陳凱歌近期約見過王力宏同黎明（圖），唔知邊個機會大啲呢？