Rachel的老闆娘初為人母，對初生嬰兒照顧得無微不至，還帶同BB上班方便照顧，不過有時令旁人頗為不便，「我老闆肆無忌憚喺公司開住房門餵人奶，仲驚死無人知佢BB要開餐，大大聲同BB講食奶奶啦，成公司人都知道啦。」
這個母愛滿瀉的老闆娘令Rachel及一眾同事頗為尷尬，「男女同事行過都望到佢餵奶，有時連速遞員入來都見到，好心佢閂門啦！」網民muppet指餵人奶十分平常，Rachel大驚小怪反而失禮人，「BB仔飲人奶係一件好事，你老闆咁做好值得鼓勵，外國好多媽媽都係咁樣餵人奶。」網民noeyesee指Rachel可能成為老闆娘「家臣」，「要代佢買尿片、奶粉，可能要搵埋幼稚園㖭。」
根據香港母乳育嬰協會統計，本港只有兩成五的嬰兒獲持續餵哺母乳達六個月，遠低於全球平均水平的三成六，該會促請政府加強推動，如規定公眾場所設立育嬰間，以便母親哺乳。