踏入07年，機場管理局除咗就快有新行政總裁，仲有新寫字樓用。如果大家近期有去機場，就會發現客運大樓對面嘅航天廣場（客運大樓二期）已經差唔多竣工，旁邊兩幢七層高寫字樓，其中一幢，係機管局新總部，部份機管局同事，近日開始執嘢搬去新總部返工。
機管局𠵱家其實有兩個辦公地方，一個喺機場禁區；一個喺富豪機場酒店對面，部門之間嘅同事要開會，少不免要兩頭騰，唔多方便，所以機管局一早希望有個新總部，將所有同事集埋一齊，提高營運效率。
華華聽聞，新總部內櫳裝修已經七七八八，部份機管局同事搬緊過去，估計下個月底全部搬好晒，董事局高層當然進駐最高嗰層啦。候任行政總裁許漢忠2月1日就返工，即刻用到新寫字樓，一切都有個新開始。