曼聯近期食住車路士坐穩英超聯榜首，連旗下啲球員都零舍威啲。好似後衞里奧費廸南咁，最近佢同英國內政大臣韋俊安會面，後者諗住叫里奧幫政府宣揚反暴力訊息，教導吓啲𡃁仔唔好學壞。睇番里奧以前有咩衰嘢未做過，搞性派對、打交事件成日都聽到；今次千揀萬揀揀中佢，畀晒機會佢洗底，里奧形象梗係當堂健康咗啦！