鬼神嘅嘢真係講十日十夜都講唔完，噚日講過大家上MSN都可以撞鬼，今日就搵到段見鬼五大方法的Post，真係信則有，不信則無，有膽你就試一試啦。五個見鬼方法中有啲都幾難搞，好似其中一個係叫你喺半夜兩點，拎住兩支蠟燭，去樹林搵丑時之女，搶佢手中支釘，然後釘喺樹上，再諗辦法攞佢啲血搽喺自己對眼上，咁就可以開到「天眼」。呢個方法難度可以話攞滿分，可能唔係咁啱香港使，借問聲咁「都市化」嘅香港，喺邊度搵到樹林，仲要搵個丑時之女，佢係邊位嚟㗎？唔通見女就問人係咪丑時之女咩？呢個方法唔得，再講另一個方法啦！喺亥時用柚葉蓋住對眼，子時就可以見到鬼啦！用塊柚葉就可以見鬼，咁簡單？方海閱師傅話，坊間有好多呢啲見鬼方法，見唔見到視乎個人嘅陰氣重唔重，若果陰氣較重，加埋嗰排精神唔夠，唔使用呢啲招式都可以見到鬼！
記者：區佩嫦
網址： http://www.3boys2girls.com/viewthread.php?tid=59333&extra=page%3D1